Follow by Email

Thursday, 27 September 2012

வைரமுத்து கவிதை


அகில இந்திய தமிழ் இலக்கிய அமைப்புகளின் மாநாட்டு மலருக்கு கவி பேரரசு வைரமுத்து அவர்கள் எழுதிய தமிழ் தாய் வாழ்த்து.




விழித்து பார்க்கும்
விடியல் ஒவ்வொன்றிலும்
தலையணை மீது
தலையிருந்ததில்லை

விரலோடு நுரைவிரவாமால்
பல் துலக்க இன்னும்
பயிற்சியில்லை

குளிக்கும் வரைக்கும்
ஞாபகம் இருக்கும்
குளிக்கும் போது மறந்தே போகும்
காது மடல் தினமும் கழுவியதில்லை.

ஏதேனும் ஒரு விரலில்
ரத்த கோடில்லாமல்
நானறிந்து  இதுவரை
நகம் களைந்ததில்லை.

ஒரே பாய்ச்சலில்
உள்ளாடைக்குள்
கால் நுழைத்த சாதனை
நிகழ்ந்ததே இல்லை.

சீப்போடு என்னதான்
சிநேகம் பிடித்தாலும்
ஒரே வகிர்வில்
வகிடு கொண்டதில்லை.

எது உள்
எது  வெளி
பட்டிமன்றம் முடியாமல்
காலுறை அணிந்தது இல்லை.

நேற்று வரைக்கும்
ஊற்று பேனாவில்
சிந்தாமல்  மைவிட்ட
சேதியில்லை

பசிக்காத மேஜைக்கெலாம்
பந்தி வைக்காமல்
சுயமாய் பரிமாறி
சோறுண்டதில்லை

ஓடும் ரயிலில்
பிடிமானம்மில்லாமல்
சிறு நீர் கழிக்கும் திறனும்மில்லை.


எந்தவொரு மேடையிலும்
பொன்னாடையோ
கைக்குட்டையோ
போக்காமல் வந்ததில்லை.

உடையில் சிறிது
கரை சேராமல்
பச்சை இளநீர்
பருகியதில்லை

மனிதனோ நானோ
மரமோ விலங்கோ
காயப்படாமல் சைக்கிள் ஓட்டும்
கலை இன்னும் கை வரவில்லை

திரும்ப திரும்ப
திருத்தியும் திருத்தியும்
முற்றும் பிழை நீக்க முடியவில்லை

இத்தனை ஓட்டைகள்
இருப்பினும் என்னில்
வழியாதெப்படி
வந்து  நிறைந்துள்ளாய்
என் தமிழே?


No comments:

Post a Comment