Follow by Email

Monday, 30 June 2014

தனி இஸ்லாமியநாடு பிரகடனம் செய்தது ஐ.எஸ்.ஐ.எஸ்.!


சிரியா மற்றும் ஈராக்கில் தாங்கள் கைப்பற்றிய பகுதிகளை ஒருங்கிணைத்து தனி இஸ்லாமிய நாடு என்று பிரகடனம் செய்துள்ளது சன்னி முஸ்லிம்களின் ஆயுதப்படையான ஐ.எஸ்.ஐ.எஸ். அமைப்பு. இதன் கலிபாவாக (மன்னராக) அபு பக்கர் அல் பக்தாதி அறிவிக்கப்பட்டுள்ளார். 

சிரியா மற்றும் ஈராக்கில் சன்னி முஸ்லிம்களின் ஆயுதப்படையான ஐ.எஸ்.ஐ.எஸ். பெரும்பகுதிகளை கைப்பற்றி தங்கள் வசம் கொண்டுவந்துள்ளது. ஷியா முஸ்லிம்களின் ஆட்சி அதிகாரத்தை முடிவுக்கு கொண்டுவர வேண்டும் என்பது ஐ.எஸ்.ஐ.எஸ். அமைப்பின் இலக்காகும்.

இந்த அமைப்பில் ஈராக் முன்னாள் அதிபர் சதாம் உசேனின் ஆதரவாளர்கள் ஏராளாமானோர் உள்ளனர். ஐ.எஸ்.ஐ.எஸ். அமைப்புக்கு எதிராக சர்வதேச நாடுகள் எந்த ஒருநடவடிக்கையும் எடுக்காமல் மவுனம் காத்து வந்தது.



இந்த நிலையில் திடீரென ஈராக்குக்கு ஆதரவாக ரஷியா ஜெட் போர் விமானங்களை அனுப்பி தாக்குதலை நடத்த உதவியது. அமெரிக்காவும் ஆளில்லா போர் விமானங்களை அனுப்பி வைத்துள்ளது.


மேலும் ஐ.எஸ்.ஐ.எஸ். வசமுள்ள நகரங்களை மீட்க ஈராக் ராணுவம் முயற்சித்துப் பார்த்து வருகிறது. ஐ.எஸ்.ஐ.எஸ். கைப்பற்றியுள்ள திக்ரித் நகரை மீட்க ஈராக் ராணுவம் போராடிப் பார்த்தது. ஆனால் அது கைகூடவில்லை.


இதனிடையே ஐ.எஸ்.ஐ.எஸ். இயக்கத்தின் செய்தி தொடர்பாளர் அபு முஹம்மத் அல் அதானி அறிக்கை ஒன்றை வெளியிட்டுள்ளார். அந்த அறிக்கையில், சிரியா மற்றும் ஈராக்கில் தாங்கள் கைப்பற்றப்பட்ட பகுதிகளை ஒருங்கிணைந்து ‘தனி இஸ்லாமிய நாடு” அமைத்துள்ளதாக பிரகடனம் செய்யப்பட்டுள்ளது.


அத்துடன் இந்த தனி இஸ்லாமிய தேசத்தின் மன்னராக (கலிபா) ஐ.எஸ்.ஐ.எஸ். இயக்கத்தின் தலைவரான அபு பக்கர் அல் பக்தாதி இருப்பார் என்றும் அறிவிக்கப்பட்டுள்ளது.


மேலும் தங்களது அமைப்பின் பெயரான ஐ.எஸ்.ஐ.எஸ். என்பது இனி “இஸ்லாமிய தேசம்” என மாற்றப்படுவதாகவும் அந்த அறிக்கையில் கூறப்பட்டுள்ளது.



ஆடியோ ரிக்கார்டிங்கில் 34 நிமிட ‘இஸ்லாமிய தேசம்’ பிரகடனத்தை மேற்கொண்ட இந்த இயக்கத்தின் பிரமுகர் அபு மொஹமெட் அல்-அத்னானி, “தற்போது எமது கட்டுப்பாட்டு பகுதியில் வசிக்கும் அனைவரும், ‘இஸ்லாமிய தேசத்தின்’ பிரஜைகளாக மாற்றப்படுகின்றனர்.இயக்க தலைவர் அபு பக்கர் அல்-பக்தாதியின் தலைமையை ஏற்று, ‘இஸ்லாமிய தேசத்துக்கும்’ அதன் தலைவருக்கும் விசுவாசமானவர்களாக பிரமாணம் எடுத்துக்கொள்ள வேண்டும்” என தெரிவித்துள்ளார்.

இந்த ‘இஸ்லாமிய தேசம்’ அறிவிப்பு, முக்கியமானது மட்டுமல்ல, பல ராஜதந்திர குழப்பங்களையும் ஏற்படுத்த போகிறது. யுத்தத்தையும் வலுப்படுத்த போகிறது.

ஈராக்கிய ராணுவம் பகுதி கைப்பற்றிய திக்ரித் நகரத்தை மீண்டும் கைப்பற்றியதை அடுத்து, இந்த ‘இஸ்லாமிய நாடு’ அறிவிப்பு வெளியாகியுள்ளதில் இருந்து, இந்த இயக்கத்தின் பின்னணியில் சர்வதேச அரசியல் தெரிந்த யாரோ உள்ளார்கள் என்பதை ஊகிக்க முடிகிறது.

இவர்களது ‘இஸ்லாமிய தேசம்’ அறிவிப்பு இன்றைய தேதியில் வெளியாவதில் என்ன முக்கியத்துவம் தெரியுமா?

அமெரிக்காவால் பயிற்சி கொடுக்கப்பட்ட1 லட்சம் வீரர்கள் கொண்ட  ஈராக்கிய ராணுவத்தை, சம்பிரதாயமான யுத்தத்தில் தோற்கடித்துள்ளது இந்த இயக்கம். இதனால், சன்னி வகுப்பை சேர்ந்த தலைமை உள்ள சில நாடுகள், இந்த ‘இஸ்லாமிய தேசம்’ என்பதை ஏற்றுக்கொள்ள சந்தர்ப்பம் உள்ளது.

மற்றொரு விஷயம், ISIS தீவிரவாத இயக்கம் பல வெளிநாட்டவர்களை உறுப்பினர்களாக கொண்ட இயக்கம். ஈராக்கிலும், சிரியாவிலும் இந்த இயக்கத்தின் சார்பில் யுத்தம் புரியும் ஆட்களில் பெரிய சதவீதத்தினர், இந்த இரு நாடுகளையும் சேர்ந்தவர்கள் அல்ல, வெளிநாட்டவர்கள்.

இவர்களது ‘இஸ்லாமிய தேசம்’ அறிவிப்பு, மேலும் பல வெளிநாட்டவர்களை இந்த இயக்கத்தின் பக்கமாக திருப்ப போகிறது.

கட்டுரை ஆக்கம் இலக்கியா 

செயற்கைக்கோளை செலுத்த ஆற்றல் கொண்ட நாடுகள்



விண்வெளியில் ஏவுகணை செலுத்த மற்றும் அவற்றை தயாரிக்கும் ஆற்றலை கொண்ட நாடுகளின் அட்டவணை. 

செயற்கைக்கோளை தயாரிக்கும் ஆற்றல் இப்பொழுது நிறைய நாடுகளுக்கு இருக்கிறது. இதற்கு ஏராளமான பொருளாதார, அறிவியல் மற்றும் தொழிற்முறை வசதிகள் தேவையில்லை. ஆயினும் இவை வெளிநாட்டு உதவிகளை எதிர்பார்ப்பதினால் இவற்றால் செயற்கைக்கோள்களை ஏவ முடிவதில்லை. 

கீழ் உள்ள அட்டவணையில் ஆற்றல் இல்லாத நாடுகள் குறிப்பிடப்படவில்லை. ஏவுகனைகளை செலுத்தும் ஆற்றலை கொண்டுள்ள நாடுகளின் பெயர்கள் மட்டும் தான் குறிப்பிடப்பட்டுள்ளன. 

1 சோவியத் ஒன்றியம்
2 அமெரிக்கா
3 பிரான்ஸ்
4 ஜப்பான்  
5 சீனா 
6 இந்தியா
7 இஸ்ரேல்
8 ஈரான்
வெளிநாட்டு விண்வெளி நிலையங்களில் இருந்து தங்கள் சொந்த ஏவுகணை செலுத்தும் கருவிகளைக்கொண்டு பிரான்ஸ் மற்றும் யுனைடட் கிங்டம் தங்கள் முதல் செயற்கைக்கோளை செலுத்தியுள்ளன.

வட கொரியா (1998) மற்றும் ஈராக் (1989) விண்வெளியில் செயற்கைக்கோள்கள் மற்றும் போர்முனை ஏவுகணைகளை செலுத்தியுள்ளதாக கூறி இருந்தாலும் அவை இன்னும் உறுதி செய்யப்படவில்லை.

மேலும் தென்னாப்பிரிக்கா, ஸ்பெயின், இத்தாலி, ஜெர்மனி, கனடா, ஆஸ்திரேலியா, அர்ஜென்டினா, எகிப்து போன்ற நாடுகளுடன் OTRAG போன்ற தனியார் நிறுவனங்கள் தங்களது சொந்த ஏவுகணை கருவிகளைத் தயாரித்து இருந்தாலும் அவை வெற்றிகரமானவையாக இல்லை.

2009 ஆம் ஆண்டு வரை பார்க்கப்போனால், ( யுஎஸ்எஸ்ஆர் அல்லாமல் ரஷ்யா மற்றும் உக்ரைன், யூஎஸ்ஏ, ஜப்பான், சீனா, இந்தியா, இஸ்ரவேல், ஈரான்) மற்றும் ஐரோப்பிய விண்வெளி மையம், ஈஎஸ்ஏ) எட்டு நாடுகள் மற்றும் ஒரு மையம் தாமாகவே செயல்பட்டு செயற்கைக்கோள்களை செலுத்தியுள்ளன. (யுனைடட் கிங்டம் மற்றும் பிரான்ஸ் நாடுகளின் ஏவுகணை ஆற்றல் தற்பொழுது ஈஎஸ்ஏ விடம் உள்ளது.)

வட கொரியா ஏப்ரல் 2009ல் ஒரு ஏவுகணையை அனுப்பியதாக கூறினாலும் யு.எஸ் மற்றும் தென்கொரிய இராணுவ அதிகாரிகள் மற்றும் ஆயுத வல்லுனர்கள் இந்த இலக்கை வட கொரியா அடையவில்லை என்று கூறுகின்றனர்

இந்தியாவின் வியட்நாம்-1



இந்திய அமைதிப்படை இலங்கைக்குச் சென்று திரும்பிப் பல ஆண்டுகளின் பின்னர், கொழும்பில் இந்தியத் தூதராக அந்த நாட்களில் இருந்த டிக்சித் தனது பேட்டி ஒன்றில் இவ்வாறு குறிப்பிடுகிறார்:

“இலங்கை ஜனாதிபதியை நானும் இந்தியப் பிரதமர் ராஜிவ்காந்தியும் சந்தித்தபோது, இந்திய இலங்கை ஒப்பந்தத்தின் காரணமாக சிங்கள பகுதிகளில் ஏற்பட்ட கிளர்ச்சி பற்றியும் பேச்சு வந்தது. சிங்கள பகுதிகளில் ஏற்பட்ட கிளர்ச்சியை அடக்குவதற்காக இலங்கை ராணுவத்தை தமிழ் பகுதியில் இருந்து சிங்கள பகுதியை நோக்கி நகர்த்தும் யோசனையில் இருந்தார். ஜெயவர்தனே”

“அதாவது சிங்கள ராணுவத்தையே சிங்கள மக்களிடம் ஏற்பட்ட கிளர்ச்சியை அடக்க அனுப்ப முடிவு செய்தார். அப்படித்தானே”

“ஆம். அதுவேதான். அப்படி நகர்த்தும்போது வடக்கிலும், கிழக்கிலும் ஈழ விடுதலை இயக்கங்களுக்கு எதிராக நிறுத்தி வைத்துள்ள படைகளின் இடங்களில் ஒரு வெற்றிடம் ஏற்படுமே. அதற்கு என்ன செய்யப் போகின்றீர்கள் என்று ராஜிவ் காந்தி கேட்டார்.”

“அதற்கு ஜெயவர்த்தனேவின் பதில் என்ன? தமிழ் பகுதியில் இருந்து ராணுவத்தை வாபஸ் பெற்று கொள்ளப் போவதாகச் சொன்னாரா?”

“இல்லை. ஈழ விடுதலை இயக்கங்கள் தமது (இலங்கை) ராணுவம் மீது தாக்குதல் நடத்தாமல் பார்த்துக் கொள்வதற்காக இந்திய ராணுவத்தை அனுப்ப முடியுமா என்று கேட்டார் ஜெயவர்தனே.

இந்தக் கோரிக்கை இந்தியாவிடம் அதிகாரபூர்வமாக வைக்கப்பட்டால் இந்தியா தனது படைப்பிரிவு ஒன்றை நிச்சயம் இலங்கைக்கு அனுப்பும் என்று பதில் கூறினார் ராஜிவ்காந்தி”

“அப்படியான கோரிக்கை இலங்கை அரசால் அதிகாரபூர்வமாக இந்திய அரசிடம் வைக்கப்பட்டதா”

“ஆம். கோரிக்கை வைக்கப்பட்டால் நிச்சயம் செய்வோம் என்று ராஜிவ் காந்தி சொன்ன உடனேயே இலங்கை ஜனாதிபதி இப்படியான கோரிக்கைக் கடிதம் ஒன்றைத் தயாரிக்கும்படி தனது உதவியாளரிடம் கூறினார். தயாரிக்கப்பட்ட கடிதத்தில் அந்த இடத்திலேயே கையெழுத்திட்டு ராஜிவ் காந்தியிடம் கொடுத்தார் ஜெயவர்தனே. அதன்பிறகு தான் இந்திய அமைதிப்படை இலங்கைக்கு அனுப்பப்படுவது என்று இறுதி முடிவு எடுக்கப்பட்டது.”

“அப்படியானால் அதற்கு முன்னர் இந்திய ராணுவம் இலங்கைக்கு அனுப்பப்படுவது பற்றி முடிவு எடுக்கப்படவில்லையா”

“இல்லை. இந்திய ராணுவத்தை இலங்கைக்கு அனுப்புவதாக இந்திய இலங்கை ஒப்பந்தத்தில் இல்லையே. அப்படியிருக்கும்போது இந்திய ராணுவத்தை இலங்கைக்கு அனுப்புவது என்ற பேச்சுக்கே இடமில்லையே. அனுப்பும்படி இலங்கை ஜனாதிபதி அதிகாரபூர்வமாக கோரிக்கை விடுத்தார். நாங்கள் அனுப்பினோம். அவ்வளவுதான்”

மேற்படி பேட்டியைப் படித்தால் இலங்கை ஜனாதிபதியின் வேண்டுகோளின் பின்னர்தான் துரித கதியில் ஏற்பாடுகள் செய்யப்பட்டு, இந்திய ராணுவம் இலங்கைக்கு அனுப்பப்பட்டது என்பது போன்ற ஒரு தோற்றம் வருகிறதல்லவா?

ஆனால் இவர் கூறியது நிஜம் அல்ல. தாம் கூறுவது பொய் என்பது, அவருக்கு (டிக்சித்) இந்த பேட்டி கொடுத்த போதே தெரியும்!

ராஜிவ் காந்தி கொழும்பு செல்வதற்காக டில்லியில் விமானம் ஏறுவதற்கு முன்னரே, முன்னேற்பாடுகள் தொடங்கி விட்டன. இதற்கு நிறையவே ஆதாரங்கள் இருக்கின்றன.

மத்திய அரசை பொறுத்தவரை இதெல்லாம் நடப்பதற்கு சில வருடங்களுக்கு முன்னரே இந்திரா காந்தியின் காலத்தில் இலங்கை மீது படையெடுப்பதற்கான ரகசிய திட்டம் ஒன்று இந்திய ராணுவத் தளபதிகளால் போடப்பட்டு ரகசியமாக வைக்கப்பட்டிருந்தது.

சில காரணங்களினால் அந்தத் திட்டம் நிறைவேற்றப்படவில்லை.

இந்திய ராணுவம் இலங்கையில் போய் செய்யவேண்டிய காரியத்தை செய்வதற்காகவே, ஈழ விடுதலை இயக்கங்களுக்கு ஆயுதங்களும் பயிற்சிகளும் கொடுத்தார்கள். இலங்கை ராணுவத்தை தாக்க அனுப்பி வைத்தார்கள்.

உண்மையில், இந்திய ராணுவம் செய்திருக்க வேண்டிய ப்ராஜெக்ட் அது. கடைசி நேரத்தில் ஏற்பட்ட தடைகளால், ஈழ விடுதலை இயக்கங்களை நம்பி, அவர்களை வளர்த்து விட்டார்கள். அது, இந்திரா காந்தி காலத்து கதை.

பின்னர் ராஜிவ் காந்தியின் காலத்தில், இந்திய இலங்கை ஒப்பந்தம் கையெழுத்தாகும் முன்னரே இந்தியப் படைகளை இலங்கைக்கு அனுப்பும் முடிவும் எடுக்கப்பட்டு விட்டது. அதற்கான முன்னேற்பாடுகளும் தொடங்கியிருந்தன.

டில்லி தலைமை, தங்களது ராஜதந்திர திறமையால் ஜனாதிபதி ஜெயவர்தனவையே இந்திய ராணுவத்தை இலங்கைக்கு அனுப்பும்படி கேட்க வைத்தார்கள்.

ஒருவேளை ஜெயவர்தனே அப்படிக் கேட்காமல் விட்டிருந்தால் வேறு ஒரு மார்க்கத்தில் சந்தர்ப்பம் ஒன்றை உருவாக்கியிருப்பார்கள் – இந்திய ராணுவத்தை இலங்கைக்கு அனுப்புவதற்கு.

இந்திய இலங்கை ஒப்பந்தம் கையெழுத்தாவதற்கு முன்னரே இந்தியாவில் செய்யப்பட்ட சில முன்னேற்பாடுகளைப் பாருங்கள் – நாங்கள் சொல்வதில் உள்ள உண்மை புரியும்.

இந்திய படை நகர்வு இலங்கையை நோக்கி இருக்க வேண்டும் என்றால், இந்திய விமானப்படையும் கடற்படையும் தான் ராணுவ வீரர்களையும், ராணுவ உபகரணங்களையும் இந்தியாவில் இருந்து இலங்கைக்கு கொண்டு செல்ல வேண்டும்.

அந்த முன்னேற்பாடுகள் இந்திய – இலங்கை ஒப்பந்தத்துக்கு முன்பே தொடங்கிவிட்டன. இந்திய ராணுவத்தை இலங்கைக்கு அனுப்புங்கள் என ஜெயவர்த்தனே வேண்டுகோள் விடுப்பதற்கு முன்பே தொடங்கிவிட்டன.

அதுவரை காலமும் இந்திய படை நகர்வுகளின்போது ராணுவத்தினரின் போக்குவரத்து ஏற்பாடுகள் அனைத்துமே இந்திய விமானப்படையின் CAC (Central Air Command) எனப்படும் மத்திய வான்படை கட்டளை தளத்தில் இருந்தே நடைபெற்றன. இந்திய விமானப்படையின் தெற்கு பிராந்திய கட்டளை தளம் (Southern Air Command) மிகச் சிறிய அளவிலேயே இருந்தது.

தெற்கு பிராந்தியக்காரர்களின் முக்கிய மையம் திருவனந்தபுரத்திலும், பயிற்சி மையம் பங்களுருவிலும் இருந்தன. இந்த இரு இடங்களிலும் முக்கியமான படைப்பிரிவுகள் எதுவும் இருக்கவில்லை. போர் விமான ஆபரேஷன் எதுவும் இல்லாமல் வெறும் ஹெலிகாப்டர் ஆபரேஷன் மட்டுமே தென் பிராந்தியத்தில் இருந்தது.

தென் பிராந்திய விமானத்தளம் என்று பார்த்தால் எப்போதாவது யுத்த விமான நடமாட்டங்கள் கோயம்புத்தூருக்கு அருகிலுள்ள சூலூர் விமானப்படை தளத்திலேயே இருந்தன. அங்கே மிகச்சிறிய படைப்பிரிவான 43-வது விங் மாத்திரம் இயங்கியது. அவ்வளவுதான்.

யாழ்ப்பாணம் மீது இந்திய விமானப்படை விமானங்கள் உணவுப் பொருட்களைப் போட்ட பின்னர் – இந்திய இலங்கை ஒப்பந்தம் செய்யப்படும் முன்னர் – இந்திய விமானப்படையின் தென் பிராந்திய ஆபரேஷன் திடீரென பெரிது படுத்தப்பட்டது.

ஹின்டன் விமானப்படைத் தளத்தில் இருந்த MI-8 பிரிவும், 109-வது படைப்பிரிவும் சூலூர் விமானப்படைத் தளத்துக்கு மாற்றப்பட்டன. இந்த இரு படைப்பிரிவுகளுடன் உத்தரவிடும் தளபதியாக இந்திய விமானப்படையின் முக்கிய தளபதிகளில் ஒருவரான வி.கே.என். சப்ரே அனுப்பப்பட்டார்.

அதேபோல தென் பிராந்திய விமானப்படைத் தளங்களில் மற்றொன்றான யெலஹங்காவுக்கு (பங்களுருவுக்கு அருகேயுள்ள தளம்) 112-வது படைப்பிரிவு அனுப்பப்பட்டது. விங் கமான்டர் எஸ்.கே. சர்மாவின் தலைமையில் இந்த நகர்வு செய்யப்பட்டது.

மூன்றாவதாக 119-வது படைப்பிரிவும் விங் கமான்டர் டி.என். சாஹே தலைமையில் தென்னிந்தியாவுக்கு அனுப்பப்பட்டது. இந்தப் படைப்பிரிவு சென்னைக்கு அருகிலுள்ள தாம்பரத்தில் இருந்து இயங்கத் தொடங்கியது.

இவை அனைத்துமே ஒரு பெரிய படைநகர்வு தென்னிந்தியாவில் இருந்து ஏற்படுவதற்காக செய்யப்பட்ட ஏற்பாடுகள் என்பதை ராணுவ நகர்வுகள் பற்றித் தெரிந்த யாருமே ஒப்புக் கொள்வார்கள்.

தென்னிந்தியாவிலிருந்து ராணுவ நகர்வு என்றால், அந்தத் திசையில் இந்தியாவுக்கு அருகேயிருப்பவை இரண்டே இரண்டு நாடுகள்தான்.

ஒன்று இலங்கை, மற்றது மாலதீவு.

மாலதீவு நோக்கி இந்திய ராணுவம் அனுப்பப்பட வேண்டுமென்றால் இந்தளவுக்கு பெரிய ஏற்பாடுகள் தேவையில்லை. குட்டி நாடு அது. இதனால், ராணுவ நகர்வு முன்னேற்பாடுகள் இலங்கையை நோக்கியே இருந்தன என்று சுலபமாக ஊகித்து விடலாம்.

மீண்டும் கவனியுங்கள் – இவை எல்லாமே ஒப்பந்தம் ஏற்படுவதற்கு முன்பே செய்யப்பட்டு விட்டன.

இதற்கு அடுத்தபடியாக தொடங்கியது ‘தஞ்சாவூர் நடவடிக்கை’ என்று புகழ்பெற்ற ராணுவ நகர்வு.

இலங்கைக்கு இந்திய ராணுவம் அனுப்பி வைக்கப்பட்ட விவகாரத்துக்கு கிரீன் சிக்னல் கொடுக்கப்பட்டது, தமிழகத்தின் தஞ்சாவூரை நோக்கித்தான்! அதுதான், ‘தஞ்சாவூர் நடவடிக்கை’!

தஞ்சாவூர் நடவடிக்கை என்று இந்திய விமானப் படையினரால் கூறப்பட்ட நடவடிக்கை, மிகக் குறுகிய காலப்பகுதியில் விமானப்படைத்தளம் ஒன்றை உருவாக்கிய ஆபரேஷன். இலங்கைக்கான படைநகர்வு திட்டமிடப்பட்ட போது அதற்காக தென்னிந்தியாவின் பகுதிகளிலேயே தளங்கள் அமைக்கப்படுவது அவசியமாகியது.

அப்படியான திடீர் தளம் ஒன்றுக்காகத் தேர்ந்தெடுக்கப்பட்ட இடம், நம்ம தஞ்சை.. தஞ்சாவூர்.

தஞ்சாவூரில் ஏற்கனவே பாழடைந்த விமானப் படைத்தளம் ஒன்று இருந்தது. இரண்டாம் உலகமகா யுத்தத்தின்போது பிரிட்டிஷ்காரர்களால் உபயோகிக்கப்பட்ட தளம் அது. பிரிட்டிஷ்காரர்கள் இந்தியாவில் இருந்து அகன்ற பின்னர் உபயோகிக்கப்படாமலேயே கிடந்து பாழடைந்து கிடந்தது அது.

இந்தியா தனது ராணுவத்தின் கண்களை வடக்கு எல்லையில் பாகிஸ்தானையும், சீனாவையும் நோக்கி வைத்திருந்த காரணத்தால் தென்னிந்தியா மீது பெரிதாக அக்கறை காட்டியிருக்கவில்லை.

தென்னிந்தியாவுக்கு அருகிலுள்ள இலங்கை தங்களுக்கு ராணுவ ரீதியான அச்சுறுத்தலாக இல்லாதிருந்த காரணத்தால் இந்திய விமானப்படை தஞ்சாவூரில் கவனம் செலுத்தி, அதை உபயோகித்திருக்கவில்லை.

இப்போது திடீரென இலங்கையை நோக்கிய படை நகர்வு என்று வந்தவுடன் தஞ்சாவூர் முக்கியத்துவம் பெற்றது.

இலங்கை – இந்திய ஒப்பந்தம் ஏற்பட்ட காலத்துக்கு முன்னர் தஞ்சாவூர் விமானத்தளத்தை யாராவது பார்த்திருப்பீர்கள் என்றால் அது எந்தளவுக்குப் பாழடைந்து கிடந்தது என்பதைத் தெரிந்து கொண்டிருப்பீர்கள். ரன்வே தகர்ந்துபோன நிலையில் இருந்தது. ATC (Air Traffic Control) டவரின் கதியும் அதுவே.

திடீரென தஞ்சாவூருக்கு ஏராளமான விமானப்படையினர் வந்து இறங்கினார்கள். விமானப்படை உயரதிகாரிகள் அருகிலுள்ள ‘ஹோட்டல் தமிழ்நாடு’ என்ற தமிழக அரசு உல்லாசப்பயண துறையின் சின்னஞ்சிறு ஹோட்டலில் தங்க வைக்கப்பட்டார்கள்.

அங்கே தங்குவதற்கு போதிய ரூம்கள் கிடையாது. ‘ஹோட்டல் தமிழ்நாடு’ தவிர தஞ்சையில் உருப்படியான ஹோட்டலும் கிடையாது (1980-களில்! இப்போது எப்படியோ தெரியவில்லை. 80 களில் இந்த ஹோட்டலில் தங்கியிருக்கிறேன். கரப்பான் பூச்சி சும்மா ஓடாது, குரூப் டான்ஸே ஆடும்!)

இதனால், விமானப்படை அனுப்பிய பலர் ரூம் கிடைக்காமல் (அதிஷ்டசாலிகள்), தஞ்சாவூரில் படைத்தளம் இருந்த பகுதியில் கூடாரம் அடித்துத் தங்கினார்கள்.

விமானத்தளத்தை திருத்தும் வேலைகள் சுறுசுறுப்பாக தொடங்கின.

ATC டவர் இரு தினங்களில் திருத்தி அமைக்கப்பட்டது. அதற்குத் தேவையான ரேடார் கருவிகள் பூனேவில் இருந்து கொண்டு வரப்பட்டன. மறுபுறமாக நூற்றுக்கணக்கான தஞ்சைவாசிகள் ரன்வே உருவாக்கும் வேலையில் இறக்கி விடப்பட்டார்கள்.

தளம் இருந்த இடம் துப்புரவு செய்யப்பட்டு, சுற்றிலும் முட்கம்பியிலான வேலி போடப்பட்டு 5 தினங்களிலேயே விமானத்தளம் இயங்கும் நிலைமைக்கு கொண்டுவரப்பட்டது.

திருத்த வேலைகள் தொடங்கிய 5-வது தினமே நான்கு விமானப்படை MI-8 ரக ஹெலிகாப்டர்கள் முதல் முறையாக தஞ்சாவூரில் தரையிறங்கின. விமானப்படையின் தளபதிகளில் ஒருவரான வி.கே.என். சாப்ரே, தமது 109-வது படைப்பிரிவிலிருந்த ஹெலிகாப்டரை தாமே செலுத்திக் கொண்டு தஞ்சாவூர் வந்து தரையிறங்கினார்.

தளபதியே நேரில் வந்தவுடன் சூடு பிடித்தது, ‘தஞ்சாவூர் நடவடிக்கை’, முன்னாள் சோழ சாம்ராஜ்ய தலைநகர் தஞ்சையில் இருந்து இலங்கையை நோக்கி! 

(தொடரும்)

-விறுவிறுப்பு  ரிஷி 

ஸ்ரீமத் ராமாயணம்

அத்தியாயம் 1 



ராக்ஷஸர்களை வதம் செய்து, ராஜ்யத்தை அடைந்து ராமர் அயோத்தியில் இருந்த பொழுது, முனிவர்கள் வாழ்த்துச் சொல்ல வந்தார்கள். கௌசிகர், யவக்ரீதன், கார்க்யன், காலவர், கண்வர், மேதாதி புத்ரன், இவர்கள் கிழக்கு திசையிலிருந்து வந்தார்கள். ஸ்வஸ்தி வாசகம் சொல்லியபடி ஆத்ரேயர், பகவான் நமுசி, ப்ரமுசி, அகஸ்தியர், அத்ரி பகவான், சுமுக, விமுகர் இவர்கள் அகஸ்தியருடன் தென் திசையிலிருந்து வந்தார்கள். 

ந்ருஷத்ரு, கவஷன், தௌம்யன், ரௌத்ரேயன் என்ற மகான் ரிஷி, இவர்களும் தங்கள் சிஷ்யர்களுடன் மேற்குத் திக்கிலிருந்து வந்து சேர்ந்தார்கள். வசிஷ்டர், காஸ்யபர், அதாத்ரி, விஸ்வாமித்திரர், கௌதமருடன் ஜமதக்னி, பரத்வாஜர், சப்த ரிஷிகள், எப்பொழுதுமே வடக்கில் இருப்பவர்கள், இவர்களும் வந்து சேர்ந்தார்கள். அனைவரும் மகாத்மாவான ராமரைக் கண்டு ஆசீர்வதிக்க வந்தார்கள். 

வேத வேதாந்தங்களைக் கற்றுத் தேர்ந்தவர்கள், எல்லா வித சாஸ்திரங்களையும் அறிந்தவர்கள், தங்கள் தேஜஸால் அக்னிக்கு சமமாக இருந்தவர்கள், வாசலில் இருந்த காவல்காரனைப் பார்த்து அகஸ்தியர் சொன்னார் தாசரதியிடம் போய் சொல். ரிஷிகள் நாங்கள் வந்திருக்கிறோம் என்று சொல் என்றார். 

அகஸ்தியரை யார் என்று தெரிந்து கொண்ட காவல்காரன் உடனே ஓடிப் போய் ராமரிடம் செய்தியைத் தெரிவிக்கச் சென்றான். வாயில் காப்போன் ஆனாலும், நயம் அறிந்தவன், இங்கிதம் அறிந்தவன், சாமர்த்யசாலி. தைரியமும், சமயோசித புத்தியும் உடையவன். தருணம் அறிந்து ராமரிடம் அகஸ்தியர் முதலானோர் வந்திருப்பதை தெரிவித்தான். 

பூர்ண சந்திரன் போன்ற ஒளியுடன் அமர்ந்திருந்த ராகவன், இவர்கள் வந்து காத்திருக்கிறார்கள் என்று கேட்ட மாத்திரத்தில் அவர்களை சௌக்யமாக உள்ளே அழைத்து வா என்று உத்தரவிட்டு, தானும் கை கூப்பியபடி அவர்களை வரவேற்கத் தயாராக வந்து சேர்ந்தார். பாத்3யம் அர்க்4யம் இவைகளைக் கொடுத்து பூஜித்து, அரண்மனைக்குள் மரியாதையாக அழைத்து வந்து தகுந்த ஆசனங்க ளில் அமரச் செய்தார். 

பொன் வேலைப்பாடமைந்த விரிப்புக ளில் சிலர், குசம் என்ற புல்லைப் பரப்பி சிலர், மான் தோல் விரித்து சிலர் என்று தங்கள் சௌகர்யம் போல அமர்ந்தனர். ராமர் குசலம் விசாரித்தார். வந்திருந்த மகரிஷிகள், வேதம் அறிந்த பண்டிதர்களும் ராமரைக் குசலம் விசாரித்தனர். 

ரகு நந்தனா, நாங்கள் நலமே. எங்கும் யாவரும் நலமே. நல்ல வேளையாக உன்னையும் நலமாகக் காண்கிறோம். சத்ருக்களை அழித்து விட்டு வந்திருக்கிறாய். உலகை துன்புறுத்திக் கொண்டு இருந்த ராவணனை அழித்தாய். புத்ர பௌத்ரர்களோடு ராவணன் அழிந்தான். 

ராமா, உனக்கு இது ஒரு பொருட்டல்ல. வில்லைக் கையில் எடுத்தால் நீ மூவுலகையும் வெற்றிக் கொள்ளக் கூடியவனே. உன் கையால் ராக்ஷஸ ராஜா, அவர்கள் தலைவன் ராவணன் மடிந்தான். மிகப் பெரிய வீரனை வென்று வெற்றி வாகை சூடியவனாக உன்னைக் காண்கிறோம். 

சகோதரன் லக்ஷ்மணனுடனும், சீதையுடனும் சௌக்யமாக திரும்பி வந்தாயே, அதுவே நல்ல காலம் தான். சந்தோஷம். சகோதரர்கள் ஒன்று சேர்ந்தது சந்தோஷம். சொல்லப் போனால், ப்ரஹஸ்தன், விகடன், விரூபாக்ஷன், மகோதரன், அகம்பனன், துர்தர்ஷோ போன்ற ராக்ஷஸர்கள் அரிய உடலமைப்பு கொண்டவர்கள். 

பெரும் தேகமும் ப3லமும் கொண்டவர்கள். இவர்களே உன்னிடம் தோற்று வீழ்ந்தார்கள் என்பது போற்றக்கூடியதே. கும்பகர்ணனும், த்ரிசிரஸும், அதிகாயனும், நராந்தக, தேவாந்தகர்களும் போரில் மடிந்தார்கள். கும்பனும், நிகும்பனும் கூட நல்ல வீரர்கள். பார்க்கவே பயங்கரமான சரீரம் கொண்டவர்கள். 

கும்பகர்ணன் பிள்ளைகளான இவர்களும் மடிந்தார்கள். யுத்தம் என்றாலே மதம் கொண்டு வரும் காலாந்தக, யமாந்தகர்கள், யக்ஞ கோபன், தூம்ராக்ஷன் – இவர்கள் சாஸ்திரமும் நன்றாக அறிந்தவர்கள். 

காலனுக்கு சமமான பாணங்களால் இவர்களை அடித்து வீழ்த்தினாய். நல்லது. தேவர்களால் ஜயிக்க முடியாத ராக்ஷஸ ராஜனோடு த்வந்த யுத்தம் செய்தாயா? வரங்கள் பெற்றவன், அவனையே ஜயித்து விட்டாய். சந்தோஷம். ராவணியை (இந்திரஜித்) முன்னாலேயே வதம் செய்தது நல்லதாயிற்று. காலம் ஓடுவது போல ஓடி மறையக் கூடியவன். விஜயனாக வந்து நிற்கும் உன்னை நாங்கள் பாராட்டுகிறோம். 

இந்திரஜித் வதம் கேள்விப் பட்டவுடனேயே, இனிக் கவலையில்லை என்று நிம்மதியடைந்தோம். மகா மாயாவி. யாராலும் ஜயிக்க முடியாத படி வர தானம் பெற்றவன், சுயமாகவே பலசாலி. ரகு குல நந்தனா, இந்த ராக்ஷஸர்களை அழித்து விபீஷணனுக்கு அபயம் கொடுத்து நல்லதே செய்தாய். மேலும் மேலும் வெற்றிகளைப் பெற்று அமோகமாக இருப்பாய். இப்படி உள்ளன்போடு ரிஷிகள் சொல்லி வாழ்த்தி, பாராட்டியதைக் கேட்டு ராமர், பணிவோடு வினவினார். 

எனக்கு ஒரு விஷயம் ஆச்சர்யமாக இருக்கிறது. கும்பகர்ணனையும், ராவணனையும் விட்டு, நீங்கள் ராவணியை ஏன் இப்படி புகழ்ந்து பேசுகிறீர்கள்? மகோதரன், ப்ரஹஸ்தன், விரூபாக்ஷன் போன்ற ராக்ஷஸர்கள், போரில் மதம் பிடித்தவர்களாக செயல் படும், தேவாந்தக, நராந்தகர்களை விட்டு, நீங்கள் குறிப்பாக இந்திரஜித்தை, ராவணியை புகழ்ந்து பேசுவது ஏன்? அவனுக்கு என்ன விசேஷ தன்மை, பிரபாவம் இருந்தது? அரசனாக நான் கட்டளையிட்டுக் கேட்கவில்லை. சொல்லக் கூடுமானால் சொல்லுங்கள். 

இதில் ரகஸியம் எதுவுமில்லையே? என்றார். இந்திரனையும் அவன் ஜயித்ததாக கேள்விப் பட்டேன். யாரிடம் என்ன வரம் பெற்றான். தந்தையை விட பலசாலியாக எப்படி வளர்ந்தான். ராக்ஷஸனாக பிறந்தவன் ஏன் இந்திரனுடன் மோதினான்? வெற்றி பெற்றதும் பெரிய விஷயமே. விவரமாக சொல்லுங்கள், முனிவர்களே, என்று கேட்டுக் கொண்டார்.

தொடரும் 
நன்றி janakikrishnan.wordpress

Saturday, 28 June 2014

புலிகளின் இன்னொரு முகம் -33

ன்னைப் புலிகள் கடத்தி மூன்று கிழமைகளுக்கு மேலாகிவிட்ட போதிலும், என்ன காரணத்துக்காக என்னைத் தாங்கள் கடத்தினோம் என்பதை இதுவரை புலிகள் தெரிவிக்கவில்லை. 

குறிப்பான காரணங்கள் எதுவும் இல்லாமல் தங்களுடைய அரசியல் எதிரி என்ற காரணத்துக்காகக் கடத்துவதானால், அவர்கள் என்னை எப்பொழுதோ கடத்தியிருக்க வேண்டும். 

அன்ரனை (விவேகானந்தன்) புலிகள் கடத்தியவுடன் அப்படி ஒரு எதிர்பார்ப்பில் நான் இருந்தேன். பின்னர் செல்வி, தில்லை போன்றோரைக் கடத்திய நேரத்திலும் நான் அதனை எதிர்பார்த்தேன். அப்படியில்லாமல் இதுநாள்வரை விட்டு வைத்துவிட்டு, இப்பொழுது திடீரெனக் கடத்துவதானால் நிச்சயமாக ஏதோ காரணம் இருக்க வேண்டும்.

கடந்து இந்த மூன்று வாரங்களிலும் வதை முகாம் வாழ்க்கையில் குறிப்பிடும்படியான மாற்றங்கள் எதுவும் ஏற்படவில்லை. ஒரேயொரு மாற்றம், துணுக்காய் வதை முகாமில் வைக்கப்பட்ட நாலாயிரம் பேரும் பெரிய விசாரணைகள் எதுவும் இல்லாமல் கொல்லப்பட்டது போல இல்லாமல், இங்கு விசாரித்து விசாரித்துக் கொல்கிறார்கள். அவ்வளவுதான். 

அந்த கெட்ட நாளை எதிர்பார்த்து ஒவ்வொரு கைதியும் நடுக்கத்தில் தவித்தனர். புலிகள் பார்வையில் மிகக் குறைந்த குற்றங்கள் செய்தவர்கள் என்று புலிகளால் கருதப்படுவோரை மட்டும் தாம் நடாத்தி வந்த ‘பண்ணை’ (திறந்தவெளிச் சிறைச்சாலை) ஒன்றுக்கு அனுப்பி கட்டாய உழைப்பில் ஈடுபடுத்துவதாக சிறைக்குள் இருந்த சில புலி உறுப்பினர்கள் மூலம் அறிய முடிந்தது.

சாப்பாட்டைப் பொறுத்த வரையிலும், குளிப்பு முழுக்கைப் பொறுத்த வரையிலும் பழைய பல்லவிதான். அதே வெள்ளைப் பச்சரிசி சீனிப் பொங்கல்தான் மூன்று வேளை உணவு. சில வேளைகளில் அதுவும் இரண்டு வேளைகளாகக் குறைந்துவிடும். 

குளிக்கும் போது பாவிப்பதற்கென அங்கிருந்த அவ்வளவு பேருக்குமாக மாதத்துக்கு ஒரேயொரு ‘லைப்போய்’ சோப் வழங்கப்படும். தண்ணீர் வந்தால்தானே குளிக்க முடியும்! எனவே புலிகள் கருதியது போல அந்த ஒரு சவர்க்காரம் ஒரு மாதத்துக்குத் தாராளமாகப் போதும்!!

நான் இரவில் தூக்கத்தைத் தொலைத்து வெகுநாட்களாகிவிட்டன. வீட்டாரைப் பற்றிய கவலை ஒருபுறம். இன்னொருபுறம் அடுத்த நாள் விசாரணையில் என்ன கேட்கப்போகிறார்கள் என்ற யோசனையே மேலோங்கி நிற்கும். அந்த மன உளைச்சலால் நான் மட்டுமின்றி விசாரணையில் இருக்கும் கைதிகள் அனைவரும் பெரும்பாலும் இரவு நேரங்களில் தூங்காமல்தான் இருப்பார்கள். 

நித்திரை கொள்ளும் சிலர் கூட பயங்கரக் கனவுகளைக் கண்டுவிட்டு நள்ளிரவில் வீரிட்டுக் கத்துவது சர்வசாதாரணம். அதில் “ஐயோ அடிக்காதையுங்கோ” என்று கத்திக் குளறுவது தான் நான் அங்கிருந்த காலத்தில் பல தடவைகள் கேட்ட ஒர் ஓலம். இரவின் அந்தகாரத்தில் இந்த கெட்ட கனவுகளின் ஓங்காரம் மரண தேவதையை பக்கத்தில் நிறுத்தி வைப்பது போன்ற ஒரு பிரமையை ஏற்படுத்தும்.

எனது விசாரணை இன்னமும் முடிவடையாத படியால், என்னுடன் பெரும்பாலான கைதிகள் மனம் விட்டுப் பழகப் பயந்தனர். இருப்பினும் அவர்கள் என்னுடன் கதைப்பதற்கு மிக ஆவலாக இருக்கிறார்கள் என்பது, அவர்கள் என்னைப் பார்த்து அன்புடனும் வாஞ்சையுடனும் புன்னகைப்பதிலிருந்து புரிந்தது. சிலர் பட்டும் படாமல் சாதாரண விடயங்களை என்னுடன் பகிர்ந்து கொண்டனர்.

நான் அங்கிருந்த எல்லோருடனும் கதைத்திருக்காவிட்டாலும், அங்கிருந்தவர்களில் முக்கியமானவர்களில் சிலரைப்பற்றி படிப்படியாக அறிந்து கொண்டேன். அப்படி அறிந்த நேரத்தில் தான் ‘புளொட்’ இயக்கத்தில் இருந்து பிரிந்து ‘தீப்பொறி’ இயக்கத்தை உருவாக்கியவர்களில் ஒருவரும், சந்ததியாரின் மரணத்தின் பின்னர் அந்த இயக்கத்தை தலைமைதாங்கி நடாத்தியவருமான நோபேர்ட் (கேசவன், கோவிந்தன் என்பது அவரது ஏனைய பெயர்கள்) அங்கிருப்பதை அறிந்தேன். முதல்நாளே அவர் என்னைப் பார்த்து புன்னகைத்ததின் மர்மம் பின்னர்தான் தெரிந்தது.

நோபேர்ட்டை அதற்கு முன்னர் நான் ஒருபோதும் நேரடியாகச் சந்தித்திருக்கவில்லை. ஆனால் அவர் கண்டியிலிருந்து எமது தோழர்கள் சிலரால் சிறிது காலம் வெளியிடப்பட்ட ‘தீர்த்தக்கரை’ என்ற தரம் வாய்ந்த இலக்கிய சஞ்சிகைக் குழுவில் இருந்த போது கேள்விப்பட்டிருந்தேன். 

அவர் திரிகோணமலையில் அரச சேவையில் (கல்வி இலாகா என்று நினைவு) கடமையாற்றிய காலத்தில், அங்கு நீர்ப்பாசன இலாகாவில் கடமையாற்றிய எமது தோழர் ஒருவருடன் அவருக்கு நெருக்கமான தொடர்புகள் இருந்தது.

அந்த நெருக்கமான தொடர்புகள் காரணமாக அவர் என்னைப்பற்றிக் கேள்விப்பட்டு, என்னைச் சந்திப்பதற்கு விருப்பம் தெரிவித்திருந்தார். நான் ஒருமுறை அரசியல் கூட்டமொன்றுக்காக திரிகோணமலை சென்றிருந்த சமயம் சந்திக்க முயன்றும் அவர் கொழும்பு சென்றிருந்தபடியால் சந்திக்க இயலாமல் போய்விட்டது. 

பின்னர் ஒருமுறை திரிகோணமலையில் கடமையாற்றிய எமது தோழர் யாழ்ப்பாணம் வந்திருந்த நேரத்தில் நோபேர்ட்டும் அங்கு வந்திருந்தபடியால், யாழ்.கலட்டியிலிருந்த அந்தத் தோழரின் வீட்டில் நோபேர்ட்டை சந்திக்க ஏற்பாடு செய்யப்பட்டது. அதற்காக நான் அந்தத் தோழரின் வீட்டிற்குச் சென்று நீணட நேரம் காத்திருந்த போதும் அன்று அவர் வரவில்லை. ஏதோ சில வசதியீனங்களால் வரமுடியாமல் போய்விட்டதாகப் பின்னர் தகவல் அனுப்பியிருந்தார்.

எனவே இப்பொழுதுதான் எதிர்பாராத இடத்தில் நாம் ஒருவரை ஒருவர் சந்திக்கிறோம். சந்தித்தாலும் கண்களால் ஒருவரையொருவர் பார்த்தோமேயொழிய கதைக்கும் சூழல் இன்னமும் உருவாகியிருக்கவில்லை. நான் அவரை முதன்முதலில் கண்ட பொழுது, அவரின் முதுகு முழுவதும் புலிகளால் நடாத்திய அடி காயங்களின் தழும்புகள் நிறைய இருந்ததைக் கண்டு அதிர்ந்து போனேன். அதேநேரத்தில் எனது முறையும் இனி வரத்தானே போகிறது என எண்ணி கவலை அடைந்தேன்.

இந்த தோழர் நோபேர்ட், கோவிந்தன் என்ற புனைபெயரில் எழுதிய ‘புதியதோர் உலகம்’ என்ற நாவல் அன்றைய காலகட்டத்தில் பலராலும் வாசிக்கப்பட்ட ஒன்றாகும். அந்த நாவல் புளொட் இயக்கத்தின் உள் முரண்பாடுகள் குறித்தும், இயக்கத்துக்குள் நிகழ்ந்த வேண்டத்தகாத பல்வேறு சம்பவங்கள் குறித்தும் பேசியதால், அந்த நாவலை புலிகள் உட்பட மற்றைய இயக்கத்தவர்கள் மட்டுமின்றி, புளொட் இயக்கத்தைச் சேர்ந்தவர்களும் அதிகளவில் வாங்கி வாசித்தது எனக்குத் தெரியும். 

யாழ்.பல்கலைக்கழகத்துக்கு முன்னால் இருந்த எனது கடையில் மட்டும் நூற்றுக்கும் அதிகமான அந்த நாவலின் பிரதிகளை நான் விற்பனை செய்திருக்கிறேன். புளொட் இயக்கத்தினர் அந்த நாவலை விரும்பாத போதிலும், நான் அதை விற்பனை செய்ததைத் தடுக்க முற்படவில்லை. (இந்த நாவலின் இரண்டாவது பதிப்பு நோபேர்ட் புலிகளால் கொல்லப்பட்ட பின்பு இந்தியாவில் வெளிவந்துள்ளது)

நோபேர்ட் புலிகளால் கடத்தப்பட்ட பொழுது நான் வெளியில் இருந்தேன். உண்மையில் அவரது கடத்தல், தமது பாதுகாப்பு சம்பந்தமாக அவர்கள் கொண்டிருந்த அசட்டையின் ஒரு விளைவு என்று அப்பொழுது கேள்விப்பட்டிருந்தேன். 

அவரது இயக்கத்தைச் சேர்ந்த யாழ்.பல்கலைக்கழக மாணவனான கைதடியைச் சேர்ந்த தர்மலிங்கம், சுந்தரம் மருந்துக்கடை உரிமையாளரின் மகன் யோகசுந்தரம் (யோகன்) ஆகியோர் புலிகளால் பிடித்துச் செல்லப்பட்டு கொலை செய்யப்பட்ட பின்னர், புலிகளின் பாதுகாப்பு கெடுபிடிகள் மிகவும் இறுக்கமாக இருந்த ஒரு சூழலில், மிகவும் பிரயத்தனம் எடுத்து தமது இயக்கத்தவர்களைச் சந்தித்து நிலைமையை ஆராய்வதற்காக யாழ்ப்பாணம் வந்திருந்த போதே நோபேர்ட் கடத்தப்பட்டார்.

நோபேர்ட் கொக்குவிலில் தங்கியிருந்த வீட்டினைச் சேர்ந்த ஒரு சிறுவன் புலிகளுக்குக் கொடுத்த தகவலின் பேரிலேயே நோபேர்ட் கடத்தப்பட்டார். அவர் தங்கியிருந்த வீட்டில் ஆட்களை அழைத்து சந்திப்புகள் நடாத்தியது அந்தச் சிறுவனுக்கு வித்தியாசமாக இருந்ததால், அவன் அதைப் புலிகளுக்குத் தெரியப்படுத்தியதால் இந்த விபரீதம் நடந்துள்ளது. 

அந்தச் சிறுவன் அதை திட்டமிட்டுச் செய்தானா அல்லது எதேச்சையாகச் செய்தானா என்பது சரியாகத் தெரியவில்லை. ஆனால் புலிகள் சிறுவர்களை போராளிகளாகப் பயன்படுத்தியது மட்டுமின்றி, அவர்களை தமது உளவாளிகளாகவும் பல இடங்களில் பயன்படுத்தி வந்துள்ளனர் என்பதற்கு பல சம்பவங்கள் உதாரணங்களாக உள்ளன.

நோபேர்ட்டின் கடத்தல் எனக்கு சேகுவேராவின் கைதைத்தான் அந்த நேரத்தில் ஞாபகப்படுத்தியது. சே கியூபாவை விட்டு வெளியேறி பொலிவியப் புரட்சிவாதிகளுடன் இணைந்து அந்நாட்டில் புரட்சியை உண்டு பண்ணுவதற்காகத் தங்கியிருந்த போதுதான் கைதுசெய்யப்பட்டார். அவரையும் அங்கிருந்த சாதாரண மக்களில் ஒருவன்தான் பணத்துக்கு ஆசைப்பட்டு காட்டிக் கொடுத்ததாகச் சொல்லப்படுவதுண்டு.

நோபேர்ட்டுடன் அந்த நேரத்தில் கதைக்க முடியாவிட்டாலும், பின்னர் நாம் உரையாடக்கூடிய சந்தர்ப்பம் கிடைத்தது. குறிப்பாக, நாம் வைக்கப்பட்டிருந்த அந்த ஆனைக்கோட்டைச் சிறையிலிருந்து பின்னர் நாவற்குழி பகுதியிலிருந்த கோவிலாக்கண்டியில் புலிகள் அமைத்திருந்த திறந்தவெளிச் சிறைச்சாலையில் இருந்த ஓராண்டு காலத்தில் நாம் மிக நெருக்கமாகப் பழகவும், பல்வேறு விடயங்களையிட்டுக் கலந்துரையாடவும் முடிந்தது. இறுதியில் அவருக்கு நடந்த சோக முடிவு குறித்து சந்தர்ப்பம் வரும் பொழுது எழுதுவேன்.

அந்தச் சிறைச்சாலையில் நான் கண்ட இன்னொருவர், ஒரு காலத்தில் எம்மால் மிகவும் வெறுக்கப்பட்ட பொலிஸ் இன்ஸ்பெக்டர் தாமோதரம்பிள்ளை ஆகும். 

பொலிஸ் சேவையிலிருந்து ஓய்வு பெறுவதற்கு முன்னர் யாழ்ப்பாணம் குருநகர் பகுதியில் அமைந்திருந்த பொலிஸ் நிலையத்தில் பொறுப்பதிகாரியாகப் பணியாற்றிய தமோதரம்பிள்ளை, முன்னாள் யாழ்.மாநகர முதல்வர் அல்பிரட் துரையப்பாவை புலிகள் பொன்னாலை வரதராஜப் பெருமாள் கோவிலில் வைத்து சுட்டுப்படுகொலை செய்தது சம்பந்தமாக தீவிர விசாரணைகளில் ஈடுபட்டவர்களில் ஒருவராவார். 

அந்தக் கொலைச் சம்பவத்தில் புலிகளின் தலைவர் வே.பிரபாகரனும் பங்குபற்றியிருந்தார். (பிரபாகரன் பங்குபற்றியிருந்தாலும், அவர் சுடவில்லை என்றும், தனது கடையில் அடுக்கி வைக்கப்பட்டிருந்த சோடா பெட்டிகளின் மறைவில் நடுங்கும் கரங்களுடன் கையில் ஒரு பிஸ்டலுடன் அவர் நின்றிருந்தார் என்றும், அந்தக் கோவிலின் அருகே தேநீர்க்கடை வைத்திருந்த ஒருவர் சொன்னதாக பின்னர் தகவல்கள் வெளியாகி இருந்தன)

துரையப்பா கொலை வழக்கில் சம்பந்தப்பட்ட வழக்கில் தங்கள் தலைவர் பிரபாகரனைக் கைதுசெய்வதற்கு தாமோதரம்பிள்ளை அதீத முயற்சி எடுத்தமையே அவர் புலிகளால் கடத்தப்பட்டமைக்கான காரணமாகும். நான் அவரைச் சிறைக்குள் கண்டபொழுது அடையாளம் பிடிக்க முடியவில்லை. 

ஏனையவர்கள் சொல்லித்தான் ஓரளவு ஊகிக்க முடிந்தது. பொலிஸ் சேவையிலிருந்த போது மிகவும் கம்பீரமாக இருந்து பலரைப் ‘பதம்’ பார்த்த தமோதரம்பிள்ளை, அவரின் அப்பனுக்கும் அப்பனான புலிகளின் பிடியில் சிக்கிய பின்னர், புலிகளால் ‘துவைக்கப்பட்டு’ சிதிலமாகிப் போய் இருந்தார். 

அங்கு நான் அவரைக் கண்டபொழுது அவர் மனம் பிறழ்ந்த நிலையிலேயே இருந்தார். யாருடனும் பேசமாட்டார். அநேகமான நேரங்களில் அந்தச் சிறிய ஹோலுக்குள் முன்பக்கமிருந்து பின்னுக்கு நடந்த வண்ணம் இருப்பார்.

இந்த இன்ஸ்பெக்டர் தமோதரம்பிள்ளையுடனான எமது கணக்கு வழக்கு புலிகள் தோன்றுவதற்கு முன்னரானது. அது 1960களில் தோன்றிய ஒன்றாகும். அப்பொழுது எமது கட்சி ஆரம்பித்த வெகுஜன அமைப்பான தீண்டாமை ஒழிப்பு வெகுஜன இயக்கம் 1966 – 70 காலப்பகுதியில் வடபகுதி முழுவதும் தீண்டாமைக்கும் சாதி அமைப்புக்கும் எதிரான போராட்டத்தை பெரிய அளவிலும் எழுச்சியுடனும் முன்னெடுத்து வந்தது. 

ஆலயப் பிரவேசம், தேநீர்க்கடைப் பிரவேசம், பொது இடங்களிலுள்ள கிணறுகளில் தாழ்த்தப்பட்ட மக்கள் தண்ணீர் அள்ளுதல் என, அந்தப் போராட்டம் வட பகுதியெங்கும் தீச்சுவாலையாகசக் கொழுந்துவிட்டுச் சுழன்றடித்தது. 

அந்தப் போராட்டத்துக்கு எதிராக அந்த நேரத்தில் இரண்டு ‘வில்லன்கள்’ தோன்றினார்கள். ஒருவர் பிரசித்தி பெற்ற மாவிட்டபுர ஆலயப் பிரவேசப் போராட்டத்துக்கு எதிராகச் சாதி வெறியர்களையும், குண்டர்களையும் திரட்டி வைத்துக்கொண்டு, மாவிட்டபுரம் கந்தசாமி கோவிவில் நின்று ஆலயப் பிரவேசம் செய்ய வந்த தாழ்த்தப்பட்ட மக்களை தாக்கி அட்டகாசம் செய்த முன்னாள் வவுனியா பாராளுமன்ற உறுப்பினரும், அடங்காத் தமிழர் முன்னணியின் தலைவரும், ஓய்வுபெற்ற கணிதப் பேராசிரியருமான சி.சுந்தரலிங்கம்.

மற்றையவர் அப்பொழுது சங்கானை பொலிஸ் நிலையத்தில் சார்ஜனாகப் பணியாற்றிய தாமோதரம்பிள்ளை. அவர் தடித்த சாதி வெள்ளாளரும் சாதி வெறியருமாக இருந்தார். 

தீண்டாமை ஒழிப்புப் போராட்டத்தில் சங்கானைப் பகுதியிலிருந்த நிச்சாமம் கிராமம் ஆரம்பம் முதல் முன்னணியில் நின்றதால், அங்கு சாதி வெறியர்களுக்கும் தாழ்த்தப்பட்ட மக்களுக்கும் இடையில் பல மோதல்கள் நிகழ்ந்ததுடன், சில உயிர்ச்சேதங்களும் கூட இரு பகுதியிலும் ஏற்பட்டன. அதனால் அங்கு எப்பொழுதும் ஒரு பதட்ட நிலை இருந்து வந்தது.

ஆனால் பதட்டத்தைத் தணித்து சட்டத்தையும் ஒழுங்கையும் பேணவேண்டிய பொலிஸார், சாதி வெறியர்களின் பக்கம் நின்றுகொண்டு தாழ்த்தப்பட்ட மக்களுக்கு பல துன்புறுத்தல்களைச் செய்தனர். சில பொலிஸ் நிலையங்களில் சிங்களவர்கள் பொலிஸ் பொறுப்பதிகாரிகளாக இருந்த போதிலும், அங்கு இரண்டாம் நிலையில் கடமையாற்றிய தமோதரம்பிள்ளை போன்றவர்கள் சிங்களப் பொறுப்பதிகாரிகளையும் மீறி தாம் நினைத்தபாட்டுக்குச் செயற்படும் ஒரு சூழல் இருந்தது. 

அந்த நிலைமைக்கு ஒரு காரணம், அந்த நேரத்தில் ஆட்சியிலிருந்த பிரதமர் டட்லி சேனநாயக்க தலைமையிலான ஐ.தே.க அரசாங்கத்தில் தமிழரசுக் கட்சியும் தமிழ் காங்கிரஸ் கட்சியும் பங்காளிகளாக இருந்தமையாகும். வட பகுதியின் உயர்சாதி மேட்டுக்குழாமினரின் பிரதிநிதிகளாக அன்றும் இன்றும் இருந்து வரும் இவர்கள், தாழ்த்தப்பட்ட மக்களின் உரிமைப் போராட்ங்களை ஒடுக்குவதில் அர இயந்திரத்தின் ஒரு பகுதியான பொலிஸாரை – குறிப்பாக தமிழ் பொலிஸாரை அந்த நேரத்தில் பயன்படுத்திக் கொண்டனர். 

அதிலும் நிச்சாமம் கிராமமும், தமோதரம்பிள்ளை பணியாற்றிய சங்கானை பொலிஸ் நிலையமும் தமிழரசுக் கட்சியின் பெரும் தூண்களில் ஒருவரான வட்டுக்கோட்டைப் பாராளுமன்ற உறுப்பினர் அ.அமிர்தலிங்கத்தின் தொகுதியில் இருந்ததால், அதே கட்சியின் தீவிர ஆதரவாளரான தமோதரம்பிள்ளை போன்றவர்கள் தாம் நினைத்தபடி தாழ்த்தப்பட்ட மக்களுக்கெதிராக வெறியாட்டம் ஆட முடிந்தது.

தமோதரம்பிள்ளை அந்த நேரத்தில் தான் கைதுசெய்த தாழ்த்தப்பட்ட மக்களைப் பொலிஸ் நிலையத்துக்குக் கொண்டு வந்து விரும்பியவாறு அடித்து நொருக்கினார். அதுமட்டுமல்லாமல் அவர்களுக்கு பொலிஸ் தடுப்புக் காவலில் இருக்கும் போது வழங்க வேண்டிய உணவோ தேநீரோ கூட வழங்காமல் பார்த்துக் கொண்டார். தண்ணீர் தாகத்தால் தவித்த அந்த தாழ்த்தப்பட்ட மக்கள் தண்ணீர் கேட்ட பொழுது, தமோதரம்பிள்ளை செய்த ஈனச்செயல் அங்கு பணியாற்றிய சிங்களப் பொலிசாரையே வெட்கித் தலைகுனிய வைத்தது. 

தொடரும்
நன்றி.
அன்புடனும் தோழமையுடனும்,
மணியம்.  இது தேனீ’ பிரசுரம்

புலிகளின் ‘திடுக்’ வேலைகள்-2

2009-ம் ஆண்டு மே மாதம் நடுப்பகுதியில், இலங்கை முள்ளிவாயக்கால் பகுதியில் முடிவுக்கு வந்தது, விடுதலைப் புலிகள் இயக்கம். யுத்தத்தின் இறுதி நாட்களில் சம்பவித்த பிரபாகரனின் மரணத்துக்கு சில தினங்களுக்கு முன் உயிரிழந்தார் காஸ்ட்ரோ.
பொட்டு அம்மான்
இவர்தான், விடுதலைப் புலிகளின் வெளிநாட்டு செயல்பாடுகளுக்கு பொறுப்பாளராக இருந்தவர். (இவருக்கே தெரியாமல், பொட்டு அம்மான் தலைமையிலான புலிகளின் உளவுப்பிரிவினர், வெளிநாடுகளில் மற்றொரு நெட்வேர்க்கை இயக்கி வந்தனர். அதை வேறு ஒரு கட்டுரையில் விளக்கலாம்)



கே.பி

விடுதலைப் புலிகள் இயக்கம் 1990-களிலும், 2000-ம் ஆண்டுகளின் தொடக்கத்திலும் வெற்றி மேல் வெற்றி பெற்றுவந்தபோது, வெளிநாட்டு செயல்பாடுகளை கவனித்தவர், கே.பி. (குமரன் பத்மநாதன், என்கிற செல்வராசா பத்மநாதன்).

இவரது காலத்தில் எல்லாமே ஒழுங்காக நடந்து கொண்டிருக்க, 2002-ம் ஆண்டு இலங்கை அரசுடன் சமாதான பேச்சுவார்த்தைகள் தொடங்கின.

பேச்சுவார்த்தை குழு தாய்லாந்து (பாங்காக்) சென்றபோது, கே.பி. தாய்லாந்தில் இருந்தார். பேச்சுவார்த்தை குழுவில் ஒருவராக சென்ற புலிகளின் முன்னாள் அரசியல்துறை பொறுப்பாளர் தமிழ்செல்வன், பேச்சு வார்த்தை முடிந்து வன்னி திரும்பியதும், முதல் வேலையாக கே.பி. பற்றி பிரபாகரனிடம் வத்தி வைத்தார்.

தமிழ்செல்வன்
அதற்கு வன்னியில் இருந்த வேறு சில தளபதிகளும் ஒத்து ஊதவே, கே.பி.யிடம் இருந்த பொறுப்புகள் அனைத்தையும் பறித்து பிரபாகரன் கொடுத்த நபர்தான், காஸ்ட்ரோ.

இவரது நிஜப் பெயர் வீரகத்தி மணிவண்ணன். யுத்தத்தில் ஷெல் விழுந்ததால், இடுப்புக்கு கீழ் செயலிழந்த நிலையில், சக்கர நாற்காலியில் இருந்தவர். திறமை என்பதை விட விசுவாசம் என்பதற்கு மதிப்புக் கொடுத்து, இவரிடம் வெளிநாட்டு செயல்பாட்டு பொறுப்பை கொடுத்தார் பிரபாகரன்.

காஸ்ட்ரோ
அதற்குமுன் வெளிநாட்டு பொறுப்பாளராக இருந்த கே.பி., வெளிநாடுகளில் இருந்தே அனைத்தையும் மேற்பார்வை பார்த்துக்கொண்டு இருந்தார். அவ்வப்போது பிரிட்டன், பிரான்ஸ், கனடா என்று பயணம் செய்து, எல்லாமே சரியாக இயங்குகிறதா என பார்க்க கூடியவராக இருந்தார்.

ஆனால், காஸ்ட்ரோவோ, இலங்கை, வன்னிக்கு உள்ளேயே சக்கர நாற்காலியில் இருந்தபடி நிர்வாகத்தை கவனிக்க வேண்டிய நிலையில் இருந்தார். இதனால், வெளிநாடுகளில் ஆளாளுக்கு தமது இஷ்டப்படி ராஜாங்கம் நடத்த முடிந்தது. வெளிநாடுகளில் நடந்த பல கதைகள் காஸ்ட்ரோவின் காதுகள் வரை போவதில்லை. போனாலும், மிக தாமதமாகவே போகும். அதற்குமுன் அந்த விவகாரம் முடிந்து வேறு விவகாரம் தொடங்கிவிடும்.

இப்படியான நிலையில், ஏற்கனவே வெளிநாடுகளில் இருந்து ‘பழம் தின்று கொட்டை போட்டவர்களை’ விட, தாமே வன்னியில் இருந்து ஒருவரை வெளிநாட்டுக்கு அனுப்பி வைத்து, அவரது கையில் நிர்வாகத்தை கொடுத்தால் என்ன என்று யோசித்தார் காஸ்ட்ரோ.

அதற்காக அவர் தேர்ந்தெடுத்த நபர்தான், பேரின்பநாயகம் சிவபரன்.

பேரின்பநாயகம் சிவபரன்
இவர்தான் தற்போது, விடுதலைப் புலிகளின் சொத்துக்களில் பெரும் பகுதியை தனது கட்டுப்பாட்டில் வைத்திருக்கும் நெடியவன்.

இந்த நெடியவன், காஸ்ட்ரோவுக்கு ஒரு விதத்தில் உறவினர்கூட. இவரை காஸ்ட்ரோ தேர்ந்தெடுத்தபோது, நெடியவன் வன்னியில் என்ன செய்து கொண்டிருந்தார்?

கிட்டத்தட்ட ஒரு டூரிஸ்ட் கைடு போல இருந்தார்.

சமாதான பேச்சுவார்த்தை நடநத காலம் ஆகையால், வெளிநாடுகளில் இருந்த இலங்கை தமிழர்கள் எந்த சிக்கலும் இன்றி இலங்கைக்கு செல்லக்கூடிய நிலை காணப்பட்டது. அப்படி வன்னிக்கு வரும் வெளிநாட்டு தமிழர்களை அழைத்துச் சென்று விடுதலைப் புலிகளால் நடத்தப்பட்ட சிறுவர் இல்லங்கள் போன்ற இடங்களை சுற்றிக் காட்டும் பொறுப்பில் இருந்தார் நெடியவன்.

இதுதான், விடுதலைப் புலிகள் இயக்கத்தில் அவரது பணி!

இவரை நார்வேக்கு அனுப்பி வைத்தார் காஸ்ட்ரோ. அதன்பின், விடுதலைப் புலிகளின் வெளிநாட்டு செயல்பாடு முழுவதும் நெடியவனின் கைகளுக்கு போனது. வெளிநாடுகளில் உள்ள புலிகள் அமைப்புகளில், நெடியவன் இன்றி ஓரணுவும் அசையாது என்ற நிலை ஏற்பட்டது.

இதன் பின்னர்தான், வெளிநாடுகளில் விடுதலைப் புலிகளுக்கு அடி-மேல்-அடி விழத் தொடங்கியது. ஒவ்வொரு நாடாக விடுதலைப் புலிகள் இயக்கத்தை பயங்கரவாத பட்டியலில் சேர்த்து தடை செய்ய தொடங்கின.

வெளிநாடுகளில் உள்ள விடுதலைப் புலி அபிமானிகள் பலர், இந்த ‘காஸ்ட்ரோ-நெடியவன்’ ஆபரேஷன், இயக்கத்தையே அழித்துவிடும் என தகவல் மேல் தகவலாக வன்னிக்கு அனுப்பினர். ஆனால் பிரபாகரன், விசுவாசியான காஸ்ட்ரோவை மாற்ற விரும்பவில்லை.

‘நொந்து போன’ ஓரிருவர், இது பற்றி நேரில் சொல்லிவிட்டு வரலாம் என வெளிநாடுகளில் இருந்து வன்னிக்கும் சென்றனர்.

அவர்கள் நந்தவனத்தில் (காஸ்ட்ரோ துறையின் அலுவலகத்தின் பெயர்) வைத்து ‘திருச்சாத்து’ வாங்கிக் கொண்டு, உயிரைக் கெட்டியாக பிடித்தபடி தப்பித்தோம், பிழைத்தோம் என்று அடுத்த பிளேனைப் பிடித்து பறந்து விட்டனர்.

இப்படியான நிலையில்தான், இறுதி யுத்தம் தொடங்கியது. விடுதலைப் புலிகள் இயக்கம் பின்வாங்கி, பின்வாங்கி, முல்லைத்தீவுக்குள் வந்து விட்டது.

யுத்த நிலைமைதான் இப்படியென்றால், வெளிநாடுகளில் நிலைமை அதைவிட மோசம்.

வெளிநாடுகளில் தமிழ் மக்களின் எழுச்சி ஏற்பட்டிருந்தது. ஆனால், அதை சரியான முறையில் பயன்படுத்த காஸ்ட்ரோவால் நியமிக்கப்பட்ட ஆட்களுக்கு தெரியவில்லை. வெளிநாட்டு அரசுகளுடனோ, உளவுத்துறைகளுடனோ, இவர்களுக்கு சரியான தொடர்பு ஏதுமில்லை. செல்வாக்கும் இல்லை.

என்ன காரணம்?

யுத்தம் தொடங்குவதற்கு முன்னரே, வெளிநாட்டு பொறுப்பாளர்களுக்கு ஒரு உரை நிகழ்த்தி அதன் சி.டி.-யை அனுப்பி வைத்திருந்தார் காஸ்ட்ரோ. அதிலுள்ள ஒரு பிரபல வாக்கியம் என்ன தெரியுமா?

“படித்தவனை நம்பாதீர்கள். உங்களுடன் சேர்த்துக் கொள்ளாதீர்கள். படித்தவன் கவிழ்த்து விடுவான்”

இதனால், வெளிநாடுகளில் காஸ்ட்ரோவின் ஆட்கள், வேட்டியை மடித்துக் கட்டிக்கொண்டு கூட்டத்துக்குள் பாயும் வீரர்களாக இருந்தார்களே தவிர, டிப்ளமேட்டிக் சர்க்கிள்களில் வலம்வரும் ஆட்களாக இல்லை.

கனடாவில் விடுதலைப் புலிகள் இயக்கத்தை தடை செய்யப் போகிறார்கள் என இரண்டு நாட்களுக்கு முன்னரே தெரிந்திருந்தது. ஆனால், அதை தடுத்து லாபி செய்யும் அளவுக்கு இவர்களுக்கு செல்வாக்கு கிடையாது. மற்ற நாடுகளிலும் அதுதான், நிலைமை.

இதற்கு சில உதாரணங்கள் சொல்லலாம். அதை அடுத்த பாகத்தில் தொடரலாம். 


விறுவிறுப்பு ரிஷி 

Thursday, 26 June 2014

வெளிநாட்டு புலிகளின் ‘திடுக்’ வேலைகள்!!


பல்லாயிரக்    கணக்கானோர் உயிர்களை கொடுத்தும், உயிர்களை எடுத்தும் வளர்ந்த விடுதலைப் புலிகள் இயக்கம் 2009-ம் ஆண்டு மே மாதம், முள்ளிவாய்க்கால் பகுதியில் கனவு போல மறைந்து போனது. பல ஆண்டுகளாக இயக்கத்தில் இருந்து போராடியவர்கள், உயிரிழந்தோ, சரணடைந்தோ, அல்லது தப்பியோடியோ விட்ட துரதிஷ்டமான நிலையில்…

முள்ளி வாய்க்காலில் இருந்து ஆயிரக்கணக்கான கிலோமீட்டர் தொலைவில், ஐரோப்பாவிலும், வட அமெரிக்காவிலும், ஆஸ்திரேலியாவிலும், சில தென்கிழக்காசிய நாடுகளிலும் சிலருக்கு அதிஷ்டம் கூரையை பிய்த்துக்கொண்டு கொட்டியது.

2009-ம் ஆண்டு மே மாதம் 18-ம் தேதி, இரவோடு இரவாக மில்லியனர்கள் ஆனவர்களும் உள்ளார்கள்.

இப்படியொரு சந்தர்ப்பம் (விடுதலைப் புலிகளின் அழிவு) ஏற்படும் என 2009-ம் ஆண்டு தொடக்கத்திலேயே ஊகித்து, புலிகளின் சொத்துக்களையும் பணத்தையும் தமது கன்ட்ரேலுக்குள் கொண்டுவந்தவர்களும் உள்ளார்கள்.

அதற்காக ஏப்ரல் மாதத்தில் இருந்து தினமும் காலையில் எழும்போது, “முடிந்ததா யுத்தம்? அழிந்ததா புலி?” என ஆவலுடன் செய்தி பார்த்தவர்களும் உள்ளார்கள்.

மே மாத தொடக்கத்தில் பிரபாகரனும், வேறு சிலரும் தப்பித்துப் போக ஒரு திட்டம் போடப்பட்டு, அதற்கு சுமார் 1 மில்லியன் டாலர் தேவை என்ற நிலையில், புலிகளின் வெளிநாட்டுப் பணத்தை கொடுக்காமல் இழுத்தடித்து, 18-ம் தேதி அந்தப் பணத்துக்கு தாமே உரிமையாளர் ஆனவர்களும் உள்ளார்கள்.

அந்த நேரத்தில் அவர்களிடம், 1 மில்லியன் என்ன, அதைவிட பலமடங்கு தொகை இருந்தது! அது அவர்களது சொந்தப் பணமல்ல, விடுதலைப் புலிகள் இயக்கத்தின் வெளிநாட்டுப் பணம்.

எப்படியோ, அவர்களில் பலர் எதிர்பார்த்தது போல, வன்னியில் யுத்தம் 2009-ம் ஆண்டு மே 18-ம் தேதியுடன் முடிந்தது. அதன் பின் வெளிநாடுகளில் தொடங்கியது, சிறப்பு யுத்தம் – பணத்துக்காக வெளிநாட்டுப் புலிகள் புரிந்த குருஷேத்திர யுத்தம்!

இதில் ஜெயித்தவர்கள் இருக்கிறார்கள். இருந்த பணத்தை இழந்தவர்கள் இருக்கிறார்கள். தப்பியோடியவர்கள், பிரிந்து போனவர்கள், புதிய கோஷ்டி தொடங்கியவர்கள் என்று தொடங்கி, மார்க்கெட் போன தென்னிந்திய நடிகைக்கு பிறந்தநாள் பரிசாக BMW கார் வாங்கிக் கொடுத்தவர்கூட இருக்கிறார்.

மிகவும் சுவாரசியமான யுத்தம் அது. ஆளையாள் ஏமாற்றிய சாதுர்யம்…

அதுவரை ஒன்றாக இருந்தவரையே வெளிநாட்டு உளவுத்துறையிடம் போட்டுக் கொடுத்து விட்டு, தாம் தப்பித்துக் கொண்ட கெட்டித்தனம்..

பணத்தை பறிக்கும் முயற்சி தோல்வியடைந்ததால், டஜன் கணக்கில் கொடுக்கப்பட்ட துரோகிப் பட்டங்கள்…

இறந்து போனவர்களில் இமெயில்களை ‘உடைத்த’ திறமை…

நேற்று ஏமாற்றி அடித்த சொத்தை இன்று வந்தவர் அடித்துக்கொண்டு போன கில்லாடித்தனம்…

இன்று வெளிநாட்டில் உள்ள சிலருக்கு, விடுதலைப் புலிகளின் யுத்தம் தோல்வியில் முடியவில்லை… அமோக வெற்றி!

பணம் பிரிக்கும் பிரச்னையில் இவர்கள் பல பிரிவுகளாக இருந்தாலும், இன்றைய தேதிவரை இவர்கள் அனைவருக்கும் உள்ள ஒரே ஒற்றுமை, ‘பிரபாகரன்’ என்ற பெயரை நம்புவதுதான்!

காரணம், அந்த ‘பெயர்’தான், இவர்களின் மில்லியன்களுக்கு பாதுகாப்பு கொடுப்பது!

“தலைவர் வரட்டும், ஒரு டாலர் குறையாமல் கணக்கு முடித்து விடுகிறேன்”

“அடுத்த யுத்தத்துக்கு தேவை என்பதால் பணத்தை பத்திரமாக பார்த்துக் கொள்ளும்படி தலைவர் நேற்றுதான் தென்னாபிரிக்காவில் இருந்து போன் பண்ணினார்”

மேலே குறிப்பிட்ட வார்த்தைகள் எல்லாம், சர்வ சாதாரணமாக சிலரது வாய்களில் இருந்து வெளியாகும்!

கேட்பவருக்கும் இது கப்சா என்று தெரியும். சொல்பவரும் சிரிப்பை அடக்கிக் கொண்டுதான் சீரியசாக சொல்வார்.

ஆனால் என்ன செய்வது? இருவருமே, “பிரபாகரன் உயிருடன் இருக்கிறார்” என்ற மந்திர வார்த்தையை வைத்துத்தான் தொழிலை நடத்துகிறார்கள்.

கணக்கு கேட்டவர், தலைவருடன் நேரில் பேசியவரின் கால்கள் தரையில் படுகிறதா என்பதை பார்த்துவிட்டு, கிளம்ப வேண்டியதுதான்.

“இவர்கள் இப்படியெல்லாம் ‘லீலைகள்’ செய்வதை பிரபாகரன் பார்த்துக் கொண்டு இருப்பாரா?” என்ற கேள்விக்கான பதிலில் உள்ளது,  “பிரபாகரன் இப்போது எங்கே?” என்ற கேள்விக்கான பதில்!

2009-ம் ஆண்டுக்குப் பின் வெளிநாட்டுப் புலிகள் சிலர் என்னவெல்லாம் செய்தார்கள், செய்கிறார்கள் என்பதை, இந்த தொடரில் தினமும் நீங்கள் படிக்கலாம். ஒரு பாகத்தில் ஒரு சம்பவம் என்ற விதத்தில் தருகிறோம். நாளை முதல் படித்துப் பாருங்களேன்!

தொடரும்..

Rishi

கேள்விகள் ஆயிரம்

* தக்ஷிணாயனம், உத்தராயனம் என்பவை யாவை?

ஒரு வருஷத்துக்கு இரு அயனங்கள், தை, மாசி, பங்குனி, சித்திரை, வைகாசி, ஆணி ஆகிய ஆறு மாதங்கள் உத்தர அயனம் என்றும். ஆடி, ஆவணி, புரட்டாசி, ஐப்பசி, கார்த்திகை, மார்கழி ஆகிய ஆறு மாதங்களை தக்ஷிண அயனம் எனவும் கூறுவர்.

* கோள்களிலிருந்து வருகின்ற காந்த அதிர்வு அலைகள் மனிதனின் எந்த பாகங்களோடுஅதிகம் தொடர்பு கொள்கின்றன?

சூரியனிலிருந்து வருகின்ற அலை- எலும்புகளோடும்
புதன் தோல் மீதும், சுக்கிரன்- ஜீவசக்தியோடும்
சந்திரன் இரத்த ஓட்டத்தோடும், செவ்வாய் எலும்பிலுள்ள மஜ்ஜையோடும்- ராகு கேது ஓஜஸோடும் தொடர்பு கொள்கின்றன. (யோகி வேதாத்ரி அவர்களின் ஆய்வு இது).

* எது ஒன்றையும் துவங்கும் போது நேரம்¢காலம் பார்ப்பது ஏன்?

மனிதன் எடுக்கின்ற காரியத்தை வெற்றிகரமாய் முடிக்க இயற்கையின் துணை வேண்டும் என்பது நம் முன்னோர்கள் அனுபவபூர்வமாக அறிந்த உண்மையாகும். நமக்கு ஏற்ற கோள்களின் நிலைகளிலிருந்து நன்மையே கிடைக்கின்ற காலத்தைக் கணிக்கவே வாரம், நட்சத்திரம், திதி, யோகம், கரனம் என்ற ஐந்தையும் பார்க்கின்ற பழக்கத்தை வைத்துள்ளார்கள். 

* வாஸ்து சாஸ்திரம் அவசியம்தானா?

நான்கு சுவர்களை அமைக்கும் போது அதற்குள் உண்டாகும் காந்தக் கலம் மனிதனுக்கு நன்மை செய்வதாகவோ, தீமை செய்பவதாகவோ அமைவது உண்டு. மற்றும் திசைகளும், கோள்களும் இயற்கையும் அருகே ஆதிக்கம் செலுத்துகின்றன. எனவே நன்மையளிக்கக் கூடிய வகையில் திசைகளுக்கேற்றவாறு வீட்டை எவ்வாறு அமைப்பது என்பதை கணித்து வாஸ்து சாஸ்திரம் அறிவுறுத்துகிறது. 

* கிரகணம் எவ்வாறு ஏற்படுகிறது? 

சூரியனுடைய மையத்தில் ஏற்படும் ராகு கேது காந்த அலைப்பாதைகளுக்கு நேராக சந்திரன், பூமி வரும் போது சுவடு மறைவு ஏற்பட்டு விடும். இதை கிரகணம் என்று சொல்கிறோம். 

பூமிக்கும், சூரியனுக்கும் இடையில் சந்திரன் நேர்க் கோட்டில் வரும் போது அங்கு சூரியன் மையத்தில் ராகு அமையும் போது சூரியனிடமிருந்து வரக்கூடிய வெளிச்சத்தை அது மறைத்து விடும். இதை சூரிய கிரகணம் என்கிறோம். 

பூரண சந்திர தினத்தில் சூரியனுக்கும் சந்திரனுக்கும் இடையில் பூமி நேர்க் கோட்டில் இருக்கும். அப்பொழுது பூமி சூரியனிடமிருந்து சந்திரன் மேல் படும் வெளிச்சத்தை மறைத்து விடும். அதை சந்திர கிரகணம் என்கிறோம். பூமி, ராகு, கேது என்ற நிழல்கிரகங்களுக்கு   நேராக வரும்போது அந்த மறைவு தெரியும். 

ராகு கேது இரண்டும் கருநிறமான நீண்ட காந்த அலைப் பாதைத்தான். அது நீளமாக வருவதால் பாம்பு என்று சொல்லி வைத்துள்ளார்கள். 

* கிரகண நாட்களில் ஏன் விரதமிருக்கிறார்கள்?

ராகு கேது காநத அலை வீச்சால் சூரிய ஒளி, சந்திர ஒளி பாதிக்கப்படும் போது நம் உடலில் ரசாயன மாற்றம் நிகழும். ஜீரண சக்தி குறையும். இச்சமயத்தில் தெய்வ நினைவோடு இருப்பது சிறந்தது. இந்நாட்களில் தாம்பத்ய உறவு கொண்டால் கர்ப்பம் தரித்து பிறக்கும்  குழந்தைகள் உடல்நலக் கோளாறுகளுடனும் நற்குணங்களில்லாமலும் இருக்க நேரிடும். 

* அமாவாசை, பௌர்ணமியன்று விரதமிருக்கக் காரணம் என்ன?

அமாவாசையன்று சூரியன், சந்திரன், பூமி மூன்றும் ஒரே நேர்க்கோட்டில் வருவதால் பூமியின் ஆகர்ஷண சக்தி மற்ற நாட்களை விட அதிகரிக்கும். 

அந்நாட்களில் விஷக்கடி நோய் உள்ளவர்களுக்கு அரிப்பு அதிகமாக இருக்கும். 

மனநோயாளிகளுக்கு வெறி அதிகப்படும். மரணத் தருவாயில் உள்ளவர்களின் உயிர் பிரியும். அந்நாளில் குழந்தை உண்டானால் மனவளர்ச்சி குன்றியதாயிருக்கும், தாம்பத்யம் ஆகாது. பௌர்ணமி நாளில் பூமி சூரியனுக்கும் சந்திரனுக்கும்இடையில் வருகிறது. அந்நாளிலும் மனித உடலில் மாற்றங்கள் நிகழ்கிறது. எனவே அமாவாசை, பௌர்ணமி நாட்களை புனிதமாகவும் விரத நாட்களாகவும் வைத்து து£ய்மையாயிருந்து இறை வழிபாடு செய்வதை முன்னோர்கள் அறிவுறுத்தியிருந்தனர். 

* யுரேனஸ், நெப்டியூன், பிளுட்டோ இவற்றை சோதிடர் கணிப்பில் சேர்க்காது விட்டு விட்டார்களே! ஏன் அவற்றிலிருந்து வெளிப்படும் கதிர்களினால் பாதிப்புகள் வருவதில்லையா?

இந்தக் கோள்கள் ஜோதிட சாஸ்திரம் கணிக்கப்பட்டக் காலத்தில் கண்டுப்பிடிக்கப்படவில்லை என்பதும் காரணமாக இருக்கலாம். அடுத்து அவை சூரியனிலிருந்து மிகத் தொலைவில் அமைந்திருப்பதால் அவற்றிலிருந்து வெளிப்படும் அதிர்வலைகள் மனிதனை பாதிப்பதில்லை. யுரேனஸ் 178 கோடி மைல் தொலைவிலும் நெப்டியுன் 279 கோடி மைல் தொலைவிலும் புளுட்டோ 366 கோடி மைல் தொலைவிலும் இருக்கிறது. 

* மந்திரம் என்றால் என்ன?

உலக வாழ்க்கையில் மனிதன் ஒரு பொருளையோ, நலத்தையோ, உயர்வையோ அடைவதற்கு ஏற்படுத்திய ஒலி அமைப்புகளுக்கு மந்திரம் என்று பெயர். மந்திரஒலி அமைப்புகள் சொற்களால் அமைக்கப் படுகின்றன. அச்சொற்களை உச்சரிக்கும் போது சொல்லின் முதலுக்கும் முடிவிற்கும் இடைப்பட்ட ஒலியே மந்திரம் எனப்படும். 

மனித வாழ்வில் எந்த சம்பத்து குறைவாக உள்ளதோ அதைப் பெறுவதற்காக அதை நிறைவு செய்ய அதற்குத் தகுந்தாற்போல கடவுளுக்கு உருவம் அமைத்துள்ளார்கள். 

அக்கடவுளுடன் தொடர்புக் கொள்ள அதற்கான தனித்தனி மந்திர ஒலிகளை வடிவமைத்துள்ளனர். அம்மந்திரங்களை ஓதிக் கொண்டிருக்கும் போது நாடி நரம்புகளில் ஓர் காந்த அதிர்வு மையம் உருவாகி நம் மனதை இறை உணர்வுடன் தொடர்புக் கொள்ளும் ஆழ் நிலைக்கு மாற்றி அமைக்கிறது. மனமும் மந்திரமும் சரியாய் செயல் படும் போது நம் வேண்டுகோள்கள் இறை சக்தி மூலம் நமக்கு நிறைவேறும் நிலையை அடைகிறது. 

* யந்திரம் என்றால் என்ன?

மந்திரங்களை உச்சரிக்கும் போது உச்சரிப்பவரின்   காந்த சக்தி உயர் நிலைக்கு மாறுகிறது. என்ன தேவையோ அந்த கருத்தை மனம் இணைந்து அனுப்ப ஒரு மீடியம் அல்லது மையப் பொருள் வேண்டும் அது படமாகவோ  தகரமாகவோ இருக்கலாம். அதுவே யந்திரம் எனப்படுகிறது. 

மந்திரங்களை தகட்டில் பதித்து அதை  குறிப்பிட்ட நாட்களுக்கு பூஜையில் வைத்து சக்தி ஏற்றுகிறார்கள். யந்திரங்களிலிருந்து வெளிப்படும் அதிர்வுகள் இயற்கை சக்திகளுடன், அதாவது ஐம்பூதங்களுடன் இணைந்து எந்த நோக்கத்திற்கு அந்த யந்திரங்கள் எழுதப்பட்டனவோ, அதையருளும் சக்தியுடன் இணைந்து சாதகமாய் உருவெடுத்து பலன் தருகிறது. 

* திலகமிட்டுக் கொள்ளும் காரணம் என்ன? 

குங்குமம் அல்லது மை வைத்துக் கொள்வதை திலகமிடுதல் அல்லது பொட்டு வைத்துக் கொள்ளல் என்பார்கள். குங்குமம் , சாந்து மை இவைகள் பண்டைக் காலத்துப் பெண்கள் சொந்தமாகத் தயாரித்துக் கொள்வார்கள். 

புருவமத்தியில் திலகமிடுவது மங்களமாகக் கருதப்படுகிறது. புருவமத்திக்கு யோக சாஸ்திரத்தில் ஆக்ஞா சக்ரம் என்று பெயர். இதை நெற்றிக்கண் என்பார்கள். தியானத்தின் போது சிந்தனை இங்கே குவியும் போது குண்டலிணி சக்தி  பிரகாசிக்கும். அப்போது தெய்வத்துடன் தொடர்புக் கொள்ளும் ஆற்றல் வருகிறது. 

சாதாரணமாக குங்குமத்திற்கு மின் கடத்தும் ஆற்றல் இருக்கிறது. நெற்றியில் குங்குமம் இட்டவுடன் அது மூளையின் பீனியல் கிளாண்ட் என்ற பகுதியை து£ண்டிவிட்டு இறைவனோடு தொடர்புக் கொள்ளும் நிலையை ஏற்படுத்திக் கொடுக்கிறது.

எனவேதான் கோவிலில் குங்குமம் திருநீறு கொடுத்தவுடன் நெற்றியில் இட்டுக் கொண்டு பின் சிறிது நேரம் அமர்ந்து இறை சிந்தனையுடன் ஒன்றி மௌனமாய் இருந்துவிட்டு வருவது பழக்கமாக இருக்கிறது. 

மற்றபடி, மற்றவரின் பார்வை மற்றும் எண்ண அலைகள் நெற்றிக்கண் என்கிற புருவமத்தி வழியே உட்புகுகின்றன. வசியம், ஹிப்நாட்டிசம் போன்ற சக்திகள் நம்மை ஆட் கொண்டு விடக்கூடாது என்பதற்காகத்தான் பெண்கள் வெளியில் செல்லும் போது வெறும் நெற்றியுடன் போகக்கூடாது என்று பெரியோர்கள் சொல்லி வைத்துள்ளனர். 

‘ ஆரத்தி ஏன் எடுக்கப்படுக்கிறது? 

பொதுவாக மணமக்களை ஆரத்தி எடுத்து வரவேற்பார்கள் அல்லது ஒரு பெண் பெரியவள் ஆகிவிட்டாள் என்று சடங்கு சுற்றும் போது, குழந்தை பிறந்து வீட்டிற்கு வரும் போதோ இது போன்ற சடங்குகள் நடைபெறுகிறது. 

ஆரத்தியில் மஞ்சள் சுண்ணாம்பு இவற்றை நீரில் கரைத்து ஒரு வெற்றிலையைக் கிள்ளிப் போட்டிருப்பார்கள். மஞ்சலும் சுண்ணாம்பு கலந்த நீர் செந்நீரமாக மாறிவிடும். மஞ்சள் கிருமி நாசினி. கால்சியம் சத்து நிறைந்த சுண்ணாம்பில் சாந்த சக்தியும் வெற்றிலையில் இரும்பு சக்தியும் உண்டு. 

பொதுவாக மணமக்களும் அல்லது ஒரு பொது நிகழ்வில் முக்கிய பாகமாய் இருக்கும் நபரும் பலருடைய பார்வைகளுக்கும் எண்ணங்களுக்கும் ஆட்படுகிறார்கள். அது அவருடைய ஒளி உடலில் அதாவது ஓளரா  எனப்படும் வளையத்தில் சலனத்தை ஏற்படுத்திவிடும் அதனால் உடல் நிலை பாதிப்படையும். 

ஆரத்தியை கரைத்து மூன்று சுற்று சுற்றி சில சமயம் சூடம் கொளுத்தி கீழே ஊற்றுவார்கள். அதில் ஒளியுடலின் சுற்றித் தொடரும் எதிர் மறை அதிர் வலைகள் சமன் படுத்தப்பட்டு ஒளியுடலின் சலனங்கள் மறைகின்றன. திருஷ்டி சுற்றிப் போடுவதும் இது போலவேதான் சில எதிர்மறை எண்ண அதிர்வுகளிலிருந்து நம் உடலின் ஒளி வளையத்தை காத்து உறுதிப் படுத்துகிறது. 

* இறப்பு வீட்டிற்கு சென்று வந்தப் பின் குளிப்பது ஏன்?

இறந்தவர் நோய் வாய்ப்பட்டு இறந்திருந்தால் அவர் இருக்கும் இடத்தில் காற்றணுக்களில் நோய் கிருமிகள் பரவி இருக்கும் சா£த்தியம் உண்டு. அடுத்து பிணத்தை இரண்டு மூன்று நாட்கள் வைத்திருக்கையில் அந்த உடலிலிருந்து துர்வாடை காற்றிகல் கலந்து உடைகளில் தொற்றும் நிலையும் உண்டு. துக்கத்தில் பங்கு பெற வந்தவர்களில் தொற்று நோயாளிகளும் இருக்கலாம் மற்றும் சோகமான எண்ண அலைகளே அவ்வீட்டில் பரவியிருக்கும். 

வீட்டிற்கு வந்து குளிர் நீரில் தலையோடு குளித்து உடைகளைத் துவைத்து உடலையும் சுத்தப் படுத்திக் கொண்டால் மனமும் அதீத சோக உணர்விலிருந்து விடுபடுகிறது. கிருமிகளிலிருந்தும் பாதுகாக்கப்படுகிறது.

* வாயில் படியில் அமரக்கூடாது, அமர்ந்து உண்ணக் கூடாது, ஏன்?

வாயின் நிலையின் நாலு பக்கங்களும் செவ்வக அமைப்பில் சீராக இருப்பதால் எதிர் மறை சக்திகள் வெளிப்படுகின்றன. இதை ‘டௌசிங்ராட்’ என்ற கருவியின் மூலம் கண்டு கண்டுபிடித்திருக்கிறார்கள். 

வாயில் படியில் அமர்வதால் நம் உடலில் எதிர் சக்திகள் உட்புகும் என்பது உறுதியாகிறது. இதனால் தான் வாயிலின் அருகில் உட்புறமோ வெளிப்புறமோ நின்றுக் கொண்டு கொடுத்து வாங்கக் கூடாது என்றும் சொல்லி வைத்துள்ளனர். அரை வட்ட வடிவில் சன்னல்களின் மேற்பகுதியோ அல்லது வாயிலின் மேற் பகுதியோ அமைக்கப்பட்டிருந்தால் அங்கே எதிர் மறை சக்திகள் வெளிப்படுவதில்லை. 

* இரவில் நகம் வெட்டக் கூடாது என்பது ஏன்?

பொதுவாக இரவில் நகம் வெட்டக்கூடாது, முடி வெட்டக்கூடாது என்று சொல்லி வைத்துள்ளனர். அதே போல் வெள்ளிக்கிழமை அமாவாசை மற்றும் புண்ணிய நாட்களிலும் இவ்வாறு செய்யக்கூடாது என்பார்கள். 

இரவில் வெட்டப்படும் நகமும், முடியும் நம் உடலில், உடையில் படிந்திருந்து நாம் உண்ணும் உணவோடு கலந்து விடக்கூடிய வாய்ப்புகள் உண்டு. பகலில் இதற்கு வாய்ப்பில்லை. இதுவும் காரணமாக இருக்கலாம்.  

‘ இரவில் வீட்டைக் கூட்டக் கூடாது என்பது ஏன்?

பொதுவாக இரவில் வீட்டைக் கூட்டினால் வீட்டிலிருக்கும் லட்சுமி வெளியேறிவிடும் என்பார்கள். 

பெரும்பாலும் இரவு நேரத்தில் குடும்ப உறுப்பினர்கள் வீட்டிற்கு வந்து சேர்ந்து விடுவார்கள். கூட்டும் போது அழுக்குகளும் து£சுகளும் காற்றி¢ல் பரக்கிறது. அது சுகாதாரக் கேடாகும். அடுத்து அக்காலத்தில் தற்காலத்தைப்போல் மின் வெளிச்ச வசதிகள் அதிகம் இல்லை. அதனால் சரியாக குப்பைகளைக் கூட்ட முடியாது. அடுத்து வீட்டில் தோடு, மூக்குத்தி எதும் சிறு சிறு பொருட்கள் விழுந்திருந்தாலும் பார்வையில் பட வாய்ப்பு இல்லை. எனவே இரவில் கூட்டுவதை இப்படிச் சொல்லி இருக்கலாம். 

‘ அதிகாலையில் எழுவது ஏன் வலியுறுத்திக் கூறப்படுகிறது.  

இரவில் து£க்கத்தைக் குறைத்து பகலில் து£ங்குவதால் ஆரோக்கியம் கெடுகிறது. அதிகாலை பிரம்ம முகூர்த்தம் எனப்படுகிறது. அப்போது தியானம் செய்பவர்கள் மனத் தெளிவு பெறுகிறார்கள். காலை வேளை து£ங்குபவருக்கு தமோ குண வளர்ச்சி அதிகமாகும். அறிவு வளர்ச்சி தடையாகும். 

மாணவர்கள் காலையில் எழுந்து படித்தால் மனதில் தெளிவாய் பதியும். சூரியன் உதித்தெழுவதற்கு 48 நிமிடங்களுக்கு முன் பிரம்ம முகூர்த்தம் ஆரம்பமாகிறது. அப்போது சரஸ்வதி விழித்திருந்து செயல்படும் நேரம் என்பது நம்பிக்கை.

அதிகாலையில் தலையின் இடப்பக்க மூளைப் பகுதி சுறுசுறுப்பாக இருக்கிறது. இதில்தான் கல்வி, அறிவு ஞாபகசக்தி மையம் இருக்கிறது. எனவே மாணவர்கள் அதிகாலை எழுந்து படித்தால் மனதில் பதியும். 

* எண்ணைக் குளியலால் என்ன பயன்?

தேக உஷ்ணம் தணியும், தோல் நலமுறும், தேகத் தசை நன்கு மசாஜ் செய்யப்டுவதால் விறைப்பு, வாயுப்பிடிப்பு இருக்காது. சுளுக்கு ஏற்படாது. உடல் வலி நீங்கி புத்துணர்ச்சி ஏற்படும். உடல் இளமையுடன் இருக்கும். வேர்க்குரு, சொரி உண்டாகாது. 
 * எண்ணெய் தேய்த்துக் குளிக்க உகந்த நாள் எது?

 வாரம் இரண்டு முறை எண்ணெய் தேய்த்துக்கொள்ள வேண்டும். பெண்கள் வெள்ளி செவ்வாய் கிழமைகளிலும், ஆண்கள் புதன், சனிக்கிழமைகளிலும் எண்ணெய்¢தேய்த்துக் கொள்ளலாம். பிறந்த நாள் இக்கிழமைகளில் வரும் தினத்தில் எண்ணெய் தேய்த்தல் ஆகாது.

கவனத்தில் கொள்ள வேண்டிய விசயம் என்னவென்றால் சில நாட்களில் கட்டாயம் எண்ணெய் தேய்ப்பதை தவிர்க்க வேண்டும் அஷ்டமி, அமாவாசை, பௌர்ணமி, துவாதசி, விரதநாட்கள், ஞாயிறு, வியாழன் கார்த்திகை, பிதுர்தினங்கள் போன்ற நாட்களில் எண்ணெய் தேய்க்கக் கூடாது.

சூரியன் உதயமான பின்னால்தான் எண்ணெய் தேய்த்துக் கொள்ளவேண்டும்.
தீபாவளி தினம் மேற்கூரிய எல்லாவற்றிலிருந்தும் விலக்கு பெறுகிறது. அன்று எந்தக் கிழமையென்றாலும், அமாவாசை என்றாலும், சூரிய உதயத்திற்கு முன்னாலும் எண்ணெய் தேய்த்துக் கொள்ளலாம்

* காலையில் யார் முகத்தில் விழிக்கலாம்?

 அன்றாடம் காலையில் தூங்கி எழுந்தவுடன் இறைவனின் படங்களைப் பார்க்கலாம். கோபுரம், சூரியன், படுக்கையில் இருந்தபடியே உள்ளங்கைகளைத் தேய்த்துக் கொண்டு அகல விரித்து கைவிரல்களைப் பார்க்கலாம். கைகளின் நுனியில் லட்சுமி இருப்பதாகவும், நடுவில் சரஸ்வதியும், கீழ்ப்புரத்தில் பார்வதியும் இருப்பதாக எண்ணி  தியானித்து வணங்கலாம். தெய்வீக அம்சங்கள் நிறைந்த பொருட்களைப் பார்த்து நாளைத் துவக்குவது நல்லது.


தொகுப்பு : சிந்தனை சிற்பி மதிவாணன் 

Saturday, 21 June 2014

வேதாளமும் வேதியனும்!!

குரு தட்சணை கேட்க துரோணருக்கு தகுதி உண்டா?

தன் முயற்சியில் சற்றும் மனம் தளராத வேதியன் புளிய மரத்தில் தொங்கிக் கொண்டிருந்த  பிரேதத்தைக்   கீழேத் தள்ளி அதை எடுத்து தோளில் போட்டுக் கொண்டு நடக்க ஆரம்பித்தான். 

 அப்போது அந்த உடலில் குடியிருந்த வேதாளம் பேச ஆரம்பித்தது. 

வேதியா!  இவ்வுலகில் சாதனைப்படைத்தவர்களின் வாழ்க்கையை பார்த்தாய் எனில் அவர்களில்  பெரும்பாலோர் தங்கள் முயற்சியில்,  சலிக்காத மனம் படைத்தவர்களாகவே இருப்பார்கள். 

சரித்திரத்தில் அப்படிஒன்றும் பெரிதாய் பேசப்படாதவனும், சாதிக்க துடித்தவனும்,  சலிக்காத மனமுடையவனுமாக இருந்த ஒரு வேடனின் கதையை உனக்குச் சொல்கிறேன் கேட்டுக் கொண்டே வா. எனக்கும் பொழுது போகும், உனக்கும் நடைக் களைப்புத் தெரியாது. 

பதின்ம வயதில் இருக்கும் சிறுவன் அவன்.  அஸ்தினாபுரத்திற்குச் சற்றுத் தொலைவில்  இயற்கை அரணாய் அமைந்திருந்த பெரும் மலைக் காட்டுக்குள் வசிப்பவன். 

நிஷாதர்கள் என்றழைக்கப்பட்ட,  வேடர் கூட்டத்தின் தலைவனான ஹிரண்யதனுஸ் என்பவனின் மகன். அவன் பெயர் ஏகலைவன். 

வேடர்குலத்தில் பிறந்ததினாலோ என்னவோ இயற்கையிலேயே வேட்டையாடும் திறன் அவனுக்கு இருந்தது. தன் வயதை ஒத்த பையன்கள் எல்லோரும் பறவையையும் முயலையும் வேட்டையாடுவதில் மும்முரம் காட்டும் போது சிறுத்தையை வேட்டையாடி,  கொண்டு வந்து  தன் கூட்டத்தினரை ஆச்சரியப்படுத்துவான்.  

வேடர்களெல்லாம் அவனைப் பெரிதும் மதித்துப் போற்றினர். தனது மகனது திறமையை வேடுவர் அனைவரும் போற்றுவதைக் கேட்டு ஏகலைவனின் தாய் தந்தைக்குப் பெருமை. 

ஏகலைவனுக்கும் ஒரு லட்சியம் இருந்தது. தனுர்வேதம் கற்று வில்வித்தையில் மிகச் சிறந்த வீரனென்று பெயரெடுக்க வேண்டும் என்பதே அது. சிறுவயதாய் இருக்கும் போது  அவனது தாத்தா அவனுக்கு ஸ்ரீஇராமரின் கதையைச் சொல்வதுண்டு. 

ஸ்ரீஇராமர் லட்சுமணர்களின் வில்திறனைக் கேள்விப்பட்டதிலிருந்து தானும் வில்வித்தைகளைக் கற்றுக் கொள்ள வேண்டும், அவர்களைப் போலவே அஸ்திரப் பயிற்சிகளையும் அறிந்து கொள்ள வேண்டும் என்ற ஆவல் அவனுக்குள் அதிகரித்துக் கொண்டேயிருந்தது.

இந்த சமயத்தில் அஸ்தினாபுரத்துக்கு கொம்புத் தேன் விற்கச் சென்ற மாயன் வந்து  சொன்னத் தகவல் அவனுக்கு நம்பிக்கைத் தருவதாய் அமைந்தது.

பாண்டவர்களுக்கும் கௌரவர்களுக்கும் வில் வித்தை கற்றுத் தர, துரோணாச்சாரியார் என்பவர் வந்திருக்கிறார், பரத்வாஜரின் புதல்வர். பீஷ்மருக்கு வில்வித்தைக் கற்றுத் தந்த பரசுராமரிடம் பயின்றவராம். வில்வித்தையில் மிகச் சிறந்த கெட்டிக்காரர் என்கிறார்கள். 

நகருக்குப் புறத்தே  அவரது ஆசிரமம் அமைந்திருக்கிறது என்று மாயன் சொன்னதும், அவரிடம் சென்று விற்பயிற்சியை மேற்கொள்வது என்று ஏகலைவன் முடிவு செய்தான்.

அடுத்தநாள் அதிகாலையில் துரோணரின் ஆசிரமத்தின் முன் பழங்கள், தேன் , காட்டில் கிடைக்கும் அரியவகை கிழங்கள், பூக்கள் நிரம்பிய தட்டுடன் நின்று கொண்டிருந்தான்.  துரோணர் தன் குடிலைவிட்டு வெளியே வந்தவுடன் அவர் காலில் விழுந்து வணங்கி தன் காணிக்கையைச் செலுத்தினான். 

யாராப்பா நீ? 

சுவாமி, நான் அஸ்தினாப்புரத்தை  அடுத்துள்ள மலைப்பகுதியில்  வசிக்கும் வேடர் குலத் தலைவனின் மகன். என் பெயர் ஏகலைவன். தங்களிடம் தனுர்வேதத்தைக் கற்றுக் கொள்ள ஆவலுடன் வந்திருக்கிறேன். என்னை தங்களின் சீடனாக ஏற்றுக் கொள்ள வேண்டும். கருணை புரியுங்கள் சுவாமி.

ஏகலைவா!  நான் அரசகுமாரர்களுக்கு மட்டுமே ஆசிரியனாயிருந்து பயிற்சி தருவது என்ற கொள்கையில் உறுதியாயிருக்கிறேன். அதில் மாற்றம் செய்து கொள்வதாக இல்லை.  உன் காணிக்கையை எடுத்துக் கொண்டு நீ போகலாம்.

ஆச்சாரியாரே! நானும் ஒரு மக்கள் கூட்டத்தின் தலைவனின் மகன்தான். என் தந்தைக்கு அடுத்து நானே அவர்களின் தலைவனாக ஆவேன். எனவே தங்கள் கொள்கைக்கு உட்பட்டவனாகத்தானே ஆகிறேன்?

இல்லை ஏகலைவா! அரசகுலத்துக்கு இணையாக உன்னை வைத்துப் பேசாதே!  மலையில் வசிக்கும் காட்டுவாசிகளுக்கு தலைவனாக இருப்பதால் நீ அரசனாகி விடமுடியாது. 

நீ வசிக்கும் பகுதிக்கு அரசன் உண்மையில் அஸ்தினாபுரத்து அரசனான திருதராஷ்டிரர்தான். அவரின் குடிமக்களே நீங்கள் அனைவரும்.  எனவே இனி என்னிடம் வாதம் செய்யாமல் திரும்பிப் போய்விடு, என்று கூறியபடி திரும்பி குடிலுக்குள் நுழைந்து விடுகிறார்  துரோணர். 

மிகுந்த மனவருத்தத்துடன் கானகம் திரும்பிய ஏகலைவன். ஒரு மரத்தினடியில் அமர்ந்து யோசிக்கிறான். ‘தன் ஆர்வத்திற்கு இப்படி ஒரு தடையா? சரி பரவாயில்லை, ஆர்வம் இருந்தால் யார்வேண்டுமானாலும் எதையும் கற்றுத்தேர முடியும். என்னால் முடியும் என்று நம்பும்போது எதையும் சாதிக்க முடியும், உனக்குள்ளிருக்கும் சக்தியே உனக்கு  வழிகளைக் காட்டித்தரும் என்று என் பாட்டனார் கூறியிருக்கிறார். 

துரோணாச்சாரியார் எனக்கு கற்றுத் தர மறுத்தாலும் நான் அவர்மீது வைத்திருக்கும் மரியாதை சிறிதும் குறையவில்லை. இது, வில்வித்தையில் அவருக்கிருக்கும் ஆற்றலின் மேல் நான் வைத்திருக்கும் மதிப்பு. 

அவரையே என் மானசீக குருவாக வைத்து தனுர்வித்தையை கற்றுக் கொள்கிறேன்’ என முடிவு செய்தான். களிமண்ணால் துரோணர் போலவே  சிலை ஒன்றை செய்தான்.  அதை தான் அமைத்த பயிற்சி திடலில் வைத்தான்.  
நல்ல நாளில் சிலையை வணங்கி வில்லைக் கையிலெடுத்தான்.  மன ஒருமுகத்துடன் குறி பார்த்து அம்பை இழுத்து இலக்கை நோக்கி எய்தான்.  தனுர் வேதத்தின் அத்தனை வித்தைகளும் அவனுக்கு கைவந்தது.

பயிற்சியையே ஒரு தியானமாக மேற்கொண்டான். அறியாத பல உண்மைகள் அவனுக்கு விளங்கியது. அஸ்திரம் எய்யும் திறன்களெல்லாம்   

ஓடிவந்து,  அவனிடம் ஒட்டிக் கொண்டது. 

மிகச் சிறந்த வில்வீரனாக மெருகேறினான் ஏகலைவன். 

ஓருநாள் பாண்டவர்களும் கௌரவர்களும் தங்கள் விற்களோடு கானகத்திற்குள் வேட்டையாட வருகிறார்கள். அவர்களுடன் சில வேட்டைநாய்களும் வருகின்றன. 

ஏகலைவன் தன் பயிற்சியில் ஒரு முகப்பட்ட மனதோடு ஈடுபட்டுக் கொண்டிருக்கிறான். மனமும் ,  கைகளும், கண்களும் ஒன்றின.  காற்றைக் கிழித்துக் கொண்டு  பறந்த அம்பு முள் முனையளவும் விலகாது சரியாய் இலக்கினைத் தொலைத்தது.

அடுத்த அம்பினை எடுத்தான். ‘வள் வள் ளென்று’ எங்கிருந்தோ வந்த நாயின் சத்தம் அவனது கவனத்தை சிதைத்தது. நாயின் சத்தம் அதிகரித்து ஏகலைவனுக்கு எரிச்சல் மூட்டியது. அதை நிறுத்து என்று அவனுள் குரல் ஒன்று எழுந்தது.

கண்களை மூடி, செவிகளைக் கூராக்கினான். சத்தம் வந்த திசையினை நோக்கி அம்புகளை செலுத்தினான்.  நாயின் சத்தம் அடங்கியது. மீண்டும் தன் பயிற்சியில் கவனம் செலுத்தினான்.

தன்பின்னால் இருந்த நாயின் குரைப்புச் சத்தம் திடீரென அடங்கி , அதன் முனகல் சத்தம் மட்டும் கேட்டதைப் பார்த்து ஆச்சரியம் அடைந்து  அர்ச்சுனன் திரும்பிப் பார்த்தான். திகைத்தான்.

எவனோ எய்த அம்புகள் கச்சிதமாய் நாயின் வாயை வளைத்து நாயின் உயிருக்கு ஆபத்து விளைவிக்காமல் வளைபோல் பின்னி மூடிவிட்டன.

தான் அறியாத வித்தையாக இருக்கிறதே. தனக்கு அனைத்து வித அஸ்திரப்பயிற்சிகளையெல்லாம் கற்றுத் தந்துள்ளதாகக் கூறிய  ஆச்சாரியார் இப்படி ஒரு வித்தையை தனக்குக் கற்றுத் தரவில்லையே?  அர்ச்சுனனின் மனம் சுருங்கியது. மனதை முகம் பிரதிபலித்தது.

யுதிர்ஷ்டர் இதைக் கவனித்து விட்டார். ‘என்ன அர்ச்சுனா ஏன் ஒரு மாதிரியாக இருக்கிறாய்?’

‘ஒன்றும் இல்லையண்ணா, உடல் சற்று அசதியாக இருந்தது. மற்றபடி எந்தக் காரணமும் இல்லை.’

‘சரி , அப்படியென்றால் திரும்பி விடலாம். படுத்து,  ஓய்வெடுத்தால் எல்லாம் சரியாகிவிடும். எல்லோரும் திரும்புங்கள், வேட்டையாடியது போதும், நேரமாகிவிட்டது. மீண்டும் வேறொருநாள் வருவோம், எனக் கட்டளையிட்டார் யுதிஷ்டர். எல்லோரும் அரண்மனை திரும்பினர்.

அர்ச்சுனன் மனம்  அமைதியடையவில்லை. நேரே ஆச்சாரியாரின் ஆசிரமம் சென்றான்.    அர்ச்சுனனின் வாடிய முகம் பார்த்ததும், ஏதோ காரணம் இருக்கிறது என்று துரோணருக்குப் புரிந்து விட்டது.

என்ன அர்ச்சுனா? இந்த நேரத்தில் என்னைத்தேடி வரக்காரணம் என்ன? 

ஆச்சாரியாரே! அஸ்திரப்பயிற்சி யாவும் எனக்கு கை வந்து விட்டதா?

அதிலென்ன சந்தேகம் அர்ச்சுனா? உன்னை மிஞ்ச இந்த பரதகண்டத்தில் ஒருவரும் இல்லை. வில்லுக்கு விஜயன் என்று உன்பெயரைத்தான் இந்த வையகம் நாளை நினைவு கூறும். ஏன் இப்படி ஒரு கேள்வியைக் கேட்கிறாய்?

குருவே! எனக்கு நீங்கள் சொல்லித்தராதது இன்னும் பாக்கியிருக்கிறது என நினைக்கிறீர்களா?

அர்ச்சுனா! உன் கேள்வியின் தொனி என்னை சந்தேகப்படுவது போல் ஒலிக்கிறது. என் மகன் அஸ்வாத்துமனுக்கு சொல்லித்தந்த வித்தைகளையெல்லாம் உனக்கும் சொல்லித் தந்திருக்கிறேன். நானறிந்த அஸ்திரப் பயிற்சிகளையெல்லாம் உனக்குக் கற்றுத் தந்திருக்கிறேன். 

இனி மேல் அதை மெருகுப்படுத்திக் கொள்வதென்பது   தனிப்பட்ட உனது திறைமையிலும் முயற்சியிலும்தான்  இருக்கிறது.  ஏன் உனக்கு இந்த சந்தேகம் வந்தது? சொல் அர்ச்சுனா?

குரு முதலில் என்னை மன்னிக்கவும். இன்று நாங்கள் வேட்டைக்குச் சென்றிருந்த போது ஒரு ஆச்சரியத்தைப் பார்த்தேன். எவனோ ஒருவன் எய்த அம்பொன்று என்னுடன் வந்த நாயின் வாயைக் கச்சிதமாய் தைத்து அதன் குரைப்பை அடக்கியது. 

அதைப் பார்த்த நொடியில் அதை எய்தவனின்  திறமையின் மேல் என்னையறியாமல் ஒரு பொறாமை உண்டாகியது. எனக்கு நிகராய் அல்ல, என்னை விட மேலான வில்லாளி ஒருவன் இங்கே இருக்கிறான், அல்லது உருவாகிக் கொண்டிருக்கிறான் என்பது எனக்கு விளங்குகிறது. 

இனி எனக்கு உறக்கம் வராது, உணவும் பிடிக்காது ஜயனே! உங்களைத் தவிர என் வேதனையை நான் யாரிடம் பகிர்ந்து கொள்வேன்?

‘நல்லது அர்ச்சுனா! என் மீது நீ வைத்திருக்கும் அன்பிற்கு நன்றி. நீ கூறியது எனக்கும் ஆச்சரியத்தை ஏற்படுத்துகிறது. நீ முயன்றால் வில்லினால் ஏகப்பட்ட வித்தைகளை செய்தகாட்டமுடியும். நாம் நாளை காலையில் கானகம் சென்று  யாரந்த வில்லாளி எனக் காண்போம். இப்போது நீ மனக்குழப்பம் இன்றி போய் தூங்கு.’   

அர்ச்சுனன் துரோணரிடம் விடைபெற்று அரண்மனை நோக்கிச் சென்றான்.

 அடுத்தநாள் காலை அர்ச்சுனனும், துரோணரும் கானகம் நோக்கி விரைந்தனர்.  நாய் வாயின் தைக்கப்பட்ட இடம் வந்ததும், சுற்றுப் புறம் முழுவதையும் தேடி அந்த பயிற்சி திடலைக் கண்டனர்.

பயிற்சி திடலின் ஒரமாய் குடிலொன்று அமைக்கப்பட்டிருந்தது. அதன் முன் புறத்தை கண்ட துரோணரின் விழிகள் ஆச்சரியத்தில் விரிந்தன.

அவரது ஆளுயுரச் சிலையொன்று அமைந்திருந்தது. அர்ச்சுனனும் அதைப் பார்த்து ஆச்சரியம் அடைந்தான்.

திடலின் வாயிற் பகுதியை நெருங்கிய வேளையில், குடிலுக்குள் இருந்து இளைஞன் ஒருவன் வெளிவந்தான். சிறுவன் என்றும் சொல்ல முடியாத இளைஞன் என்றும் சொல்லமுடியாத இரண்டும் கெட்டான் என்று சொல்லக்கூடிய தோற்றத்தில் இருந்தான்.

துரோணரின் மனம் அவனை உடனே எடைபோட்டது.  உறுதியான உடல் வாகு. வலிமையான முறுக்கேறிய புஜமும் கைகளும் அவன் சிறந்த வில்லாளன் என்பதை பறைசாற்றியது.  

முகத்தில் தெரிந்த அமைதி, அவன் மிகச் சிறந்த கெட்டிக்காரனாக இருக்க வேண்டும் என்பதையும், எளிதில் உணர்ச்சி வசப்படாத நிதானக்காரன் என்பதையும் உணர்த்தியது.

துரோணரைப் பார்த்த நொடியில் அவன் முகத்தில் மகிழ்ச்சியின் வெளிச்சம் பளிச்சிட்டது. விரைந்து வந்து, ஆச்சாரியாருக்கு வணக்கம்!   அவரது பாதங்களை வணங்கினான். 

ஏகலைவா உன் குடிலா இது? என்ன செய்கிறாய் இங்கு?

 ஆம் குருவே! என்குடில்தான்.  இதுதான் என் விற்பயிற்சிக்கூடம். 

அப்படியா, யார் உன் குரு? யாரிடம் நீ பயிற்சி பெறுகிறாய்?

ஆச்சாரியாரே! என்ன அப்படிக் கேட்டுவிட்டீர்கள்? நீங்கள்தான் என் குரு. இதோ உங்கள் சிலை. உங்களை முன்நிறுத்தித்தான் என் பயிற்சியை ஆரம்பித்தேன். மனதுக்குள் இருந்து என்னை பயிற்றுவித்தவர் நீங்கள்தான்.

ஆச்சரியம் ஏகலைவா!  உன் அனைத்து திறமைகளும் என்னால் வந்தது என்கிறாயா?

இதிலென்ன சந்தேகம் இருக்க முடியும் குருவே. என்னை வழிநடத்தியவர் நீங்கள். என் மனதில் உங்கள் உருவை நிறுத்தி உங்களிடம் கேட்பேன் நீங்கள் கூறியதைப் பின் பற்றுவேன். அப்படித்தான் கற்றேன். 

துரோணரின் புருவம் சுருங்கியது. மானசீகமாக கற்ற இவனின் திறமையே இப்படி இருக்கிறது. ஒரு குருவின் முன்னிலையில் இந்த வித்தையைக் கற்றிருந்தால் இவனைப் பிடிக்கவே முடியாது. இவனை வெல்ல ஒருவனுமே இருக்க மாட்டார்கள். 

அர்ச்சுனனின் அச்சம் சரிதான போலிருக்கிறதே! அர்ச்சுனனை மிஞ்சிய வீரனாய் இவன் நிச்சயம் வருவான். நாளை அர்ச்சுனனுக்கு சவாலாய் இருக்கப்போவதும் இவன்தான். இதை இப்படியே விட்டுவிடக் கூடாது.. என்ன செய்யலாம் என்று சில விநாடிகள் யோசனையில் ஆழ்ந்தார். 

அதற்குள் ஏகலைவன், அவர்கள் உண்பதற்கு பழங்களைக் கொண்டு வந்தான்.

ஏகலைவா! நீ என் மாணவன்தானே?

ஆம் குருவே! 

உன் குருவிற்கு நீ காணிக்கை செலுத்த வேண்டும்தானே?  நான் எதைக் கேட்டாலும் தருவாயா? 

நிச்சயமாக குருவே! அதற்காக காத்திருக்கிறேன். என்ன வேண்டும் சொல்லுங்கள்?

பின்னால் ஏன் கொடுத்தோம் என்று வருந்த மாட்டாயே?

சத்தியமாய் மாட்டேன் குருவே!

 குருதட்சணையாய் எனக்கு உன் வலது கை கட்டைவிரலைத் தா ஏகலைவா! 

ஏகலைவன் குடிசைக்குள் ஓடி தன் தந்தை தனக்கு வழங்கிய இடைவாளை எடுத்து வந்தான்.

அங்கிருந்த பாறையின் மேல் தன் வலது கையை வைத்து, இடது கையில் வாளைப் பிடித்து ஒரே வெட்டாய் வெட்டினான், கட்டை விரல் துண்டாகித் துள்ளி விழுந்தது. 

 அய்யோ இது அநீதி, இது அநீதி  என்பது போல மரத்தின் மேலிருந்த அணில்கள் கிறீச்சிட்டன. இக்காட்சியை காண சகிக்காத பறவைகள் கூட்டம்  படபடவென சிறகுகளை அடித்துக் கொண்டு, மரத்திலிருந்து எழுந்து, பறந்து வெகுதூரம் போயின.

கையிலிருந்து குருதி பீச்சியடித்தது. துரோணரின் முகத்தில் சில துளிகள் தெறித்தன.  இடது கையால் அழுத்திப்பிடித்துக் கொண்டே, வலது கட்டைவிரலை எடுத்து குருவின் பாதங்களில் வைத்தான் ஏகலைவன்.

‘ஏகலைவா உன் தட்சணையை ஏற்றுக் கொண்டேன்’  என்றார் துரோணர்.

அர்ச்சுனனுக்கு சாடை காட்டினார்.  அந்த விரலை எடுத்து ஒரு மர இலையில் சுற்றிக்  கொண்டான். இருவரும் அங்கிருந்து நகர்ந்தனர். 

வலியில் தவித்த ஏகலைவன்.பல்லைக் கடித்துக் கொண்டே,  சில பச்சிலைகளைப் பறித்து நசுக்கி விரலில் வைத்துக் கட்டினான் பீச்சியடித்த குருதி நின்றது.  பலவீனமாய் இருந்த ஏகலைவன் மயங்கித் தரையில் சரிந்தான்.

இரவில் அவனைத் தேடி வந்த நண்பர்கள் அவனைத் தூக்கிச் சென்றனர். 

அவனுக்கு நினைவு திரும்பிய போது, “குரு ஏன் என் கட்டை விரலை காணிக்கையாய் கேட்டார்’ என்றக் கேள்வி அவன் மனதில் எழுந்து கொண்டே இருந்தது. 

வேதியா!   கதை  இதற்கு மேல் தேவையில்லை என்று நினைக்கிறேன்.  ஒரு மாணவனுக்கு வித்தைகளை முறையாய் கற்றுத் தருபவனே நல்ல ஆசிரியன். தன்னைத் தேடி வந்து, தனக்கு பயிற்சி தரச்சொல்லி கெஞ்சிய ஏகலைவனை மாணவனாக ஏற்றுக் கொள்ளாத குரு. அவன் சுயமாய் பயிற்சிகளை கற்றுக் கொண்டு ஒரு சிறந்த வில்லாளி ஆனபின், நான் உன் குருதானே என்று குரு தட்சணை  கேட்டது நியாயமா? 

 ஒரு வீரனுக்கு மட்டுமன்றி ஒவ்வொரு மனிதனுக்கும் வலிமையைத் தருவது வலது கையின் கட்டைவிரல். அது இல்லையென்றால் அவனால் வலுவான வேலை எதையுமே செய்ய முடியாது. 

ஒரு வில்வீரனுக்கு, நாணிழுக்க மிகவும் இன்றியமையாதது அவனது வலது கையின் கட்டைவிரல், தான் ஒரு குருவாக எந்த ஒரு கடமையையும் செய்யாமல், ஏகலைவனது திறமைகளை இல்லாமல் செய்து விடவேண்டும் என்ற நோக்கத்தில் கட்டைவிரலை கேட்டது எந்த விதத்தில் சரியாகும்?

துரோணரின் செயல் சரியானதுதானா?  குருதட்சணைக் கேட்க அவருக்கு தகுதியிருக்கிறதா?  இந்தக் கேள்விக்கு பதில் தெரிந்திருந்தும், நீ சொல்லாமல் மௌனம் சாதிப்பாயானால் உனது தலை சுக்கு நூறாய் வெடித்துச் சிதறும். 

வேதாளமே ! சாமர்த்தியமான உன் கேள்வியை மெச்சுகிறேன்.  ஒரு செயலை அது நல்லதா கெட்டதா? சரியா தவறா? என்று எப்படி முடிவு செய்வது? அந்த செயல் என்ன விளைவுகளை உண்டாக்குகிறது, அலலது அச்செயலினால் ஏற்படும்   தொடர்விளைவு என்ன?   என்பதை வைத்தே முடிவு செய்கிறோம் என்பதுதானே சரி. 

சில சமயங்களில் உடனடி விளைவுகள் பார்ப்பதற்கு தவறாகத் தோன்றினாலும்  தொலைநோக்குச் சிந்தனையுடன் அதை ஆராய்ந்தால் பிற்கால விளைவுகள் மிகச் சரியானதாகவே இருக்கும். மிகப்பெரிய பாதகத்தை தடுப்பதாய் இருக்கும்.

இனி ஆராய்வோம்! 

துரோணரின் சிலையை செய்து வைத்து அவரை குருவாக ஏற்றுக் கொள்கிறான் ஏகலைவன். மானசீகக் குரு என்ற ஒரு ஸ்தானத்தை நம் சாஸ்திரங்கள் அங்கீகரிக்கிறது.  

நீங்கள் தான் என் குரு என்று  துரோணரிடம் கூறுகிறான் ஏகலைவன். எனவே அவனுக்கு குரு துரோணரே என்பது  தீர்மானமாகிவிடுகிறது. எனவே குருதட்சணை கேட்கும் உரிமையும் துரோணருக்கு வந்து விடுகிறது. அவர் கட்டை விரலை ஏன் கேட்டார் என்பதுதான் இப்போது முன்னிற்கும் கேள்வி.  அதற்கான காரணத்தைப் பார்ப்போம்.

ஏகலைவன் அஸ்தினாபுரத்தின் அருகில்  கானகத்தில் வசிக்கும் வேடன். எதிர்காலத்தில் அவன் அர்ச்சுனனுக்கு மேலானவனாய் உருவாவதோடு, எதிராக நிற்கக்கூடிய  கூடிய அபாயமும் நேரலாம்.  

துரோணரால் பயிற்றுவிக்க மறுத்து அனுப்ப்பட்ட இன்னொரு வீரன் கர்ணன் என்பது நமக்குத் தெரியும். அவன் அர்ச்சுனனுக்கு எதிராக போட்டிக்கு வரும்போது, துரியோதணனால் ஆதரிக்கப்பட்டான், 

அர்ச்சுனனுக்கு சவால் விடக்கூடிய நிலையில் இருக்கும் இவன், நாளை நமக்கு ஆதரவாய் இருப்பான் எனக் கருதியே துரியோதணன் அவனை நண்பனாக ஏற்றுக் கொள்கிறான். அங்க தேசத்தின் அரசனாக்கி அவனை தன் பக்கம் இழுத்துக் கொள்கிறான்.  

இருப்பினும் இந்திரன் கேட்ட தானம், குந்தி கேட்ட வரம், கண்ணபிரானின் சூழ்ச்சி எல்லாம் கர்ணனை பலவீனமாக்கிவிடுகிறது. அதனால் அர்ச்சுனனின் கையால் கொல்லப்படுகிறான். 

மேற்சொன்ன யாவும் நடைபெற்றிருக்காவிடில் அர்ச்சுனன், கர்ணன் கையால் மடிந்திருக்கவும் கூடும்.

 ‘தர்மத்தின் வாழ்வுதனை சூது கௌவும், தர்மம் மறுபடி வெல்லும்’ என்பதுதானே மகாபாரதம் வழி நாம் அறியும் நீதி. 

 தர்மம் வெல்ல வேண்டும் என்பதற்காகவே மேற்சொன்ன நிகழ்வுகள¢ யாவும் நடைபெற்றன. இல்லையெனில் தர்மத்தின் மேல் எவருக்கும் நம்பிக்கையில்லாமல் போய்விடும்.

அர்ச்சுனனை விட மிகப்பெரிய வில்வீரனாய் ஏகலைவன் உருவாகியிருக்கக் கூடிய பட்சத்தில், அஸ்தினாபுரத்தின் அருகில் தங்களது  ஆட்சிக்கு உட்பட்டு இருக்கும் கானகத்தில் வசிக்கும் அவனை தங்கள் பக்கம் இழுப்பதில் துரியோதணனுக்கு பெரிய சிரமம் இருந்திருக்காது. 

கர்ணனை  குந்தி பாசத்தால் கட்டிப்போட்டதைப் போல் ஏகலைவனை  கட்டுப்படுத்த எவராலும் முடியாமல் போயிருக்கும்.

அப்படியிருந்தால் பாண்டவர்களின் நிலை தோல்விதான். தர்மம் தோற்றுப்போகும்.    

 சரி, பாண்டவர்கள் வெற்றி பெறும் சூழலே நிலவியிருந்தாலும், இறுதியில் கர்ணனைப் போலவே ஏகலைவனும் மாண்டிருப்பான், அவனது வாரிசுகளும், வேடர் இனமும் சுத்தமாய் அழிந்து போயிருக்கும்.  

இப்படி எந்தக் கோணத்தில் பார்த்தாலும், தர்மத்தை காப்பாற்றும் வேலையையும்,  ஏகலைவனையும், அவன் இனத்தையும் காப்பாற்றும் உதவியையும் துரோணர் செய்திருக்கிறார் என்பதை நாம் அறிந்து கொள்ள வேண்டும். 

ஒரு கதையில் படித்த ஞாபகம். 

 பிற்காலத்தில் குருக்ஷேத்ரப் போர்க்களக் காட்சிகளை,  அருகிலிருக்கும் குன்றிலிருந்து ஏகலைவன் பார்வையிடுகிறான். 

விற்கள் பறக்கின்றன. அஸ்திரங்கள் எரிக்கின்றன. எங்குப்பார்த்தாலும் பிணக்குவியல்கள். கழுகுகளும், நரிகளும்  மனித உடல்களைத் தின்றுக் கொண்டிருக்கின்றன.

ஏகலைவனின் மனம் பதைக்கிறது. ‘அடக்கிருஷ்ணா! மனிதர்களை கொல்வதற்குத்தான் எல்லாப் பயிற்சிகளுமா?  எப்படி அதிகமாய் மனிதர்களை கொல்வது என்பதற்குத்தான்  இத்தனை அஸ்திரப் பயிற்சிகளையும் போட்டிப் போட்டுக் கொண்டு கற்றுக் கொள்கிறார்களா?  

ஐந்தடி நிலம் கூட தரமுடியாது என்று சொன்னதற்காகத்தான் இந்தப் போரா? இத்தனை உயிர்ச்சேதமா? 

கடவுளே! நல்ல வேளை நான் அந்த அஸ்திரப்பயிற்சிகளையெல்லாம் மறந்து தொலைத்தேன். ஏன் என் குருநாதர் என் கட்டைவிரலைக்கேட்டார் என்ற கேள்விக்கு விடைதெரியாமல் திரிந்தேன்.  

என்னையும் என் இனத்தையும் காப்பாற்றவே என் குருநாதர் என் கட்டைவிரலைக் கேட்டிருக்கிறார் என்பது இன்றுதானே எனக்குப் புரிகிறது. என் குருநாதர் எனக்கு நல்லதையல்லவா செய்திருக்கிறார்’.  என்று ஏகலைவன் எண்ணுவதாய் கதையின் போக்கு செல்கிறது. 

‘வேதாளமே! 

பகவத் கீதையில்,  ஒரு குடும்பத்தைக் காப்பாற்ற  அக்குடும்பத்தில் ஒருவரைப்  பலி கொடுக்கலாம், ஒரு கிராமத்தைக் காப்பாற்ற ஒரு குடும்பத்தைப் பலிகொடுக்கலாம், ஒரு நாட்டைக் காப்பாற்ற ஒரு கிராமத்தையே பலிகொடுக்கலாம் என்று கிருஷ்ணர் கூறுவதாக ஒரு வாசகம் வருகிறது. 

கட்டைவிரலைக் கேட்டது அநியாயம்தான்  என்று  வாதங்கள் வைக்கப்பட்டாலும், தர்மத்தை காப்பாற்றவே அந்தச் செயல் பயன்பட்டிருக்கிறது என்றுதான் பார்க்க வேண்டும்.  எனவே துரோணர் செய்தது சரியே என்பதை, யோசித்து பார்க்கையில் என்னால் ஏற்றுக் கொள்ள முடிகிறது.’ 

வேதாளத்தின் கேள்விக்கு சரியான பதிலை சொல்லியதன்  மூலம் வேதியனின் மௌனம் கலைந்ததால்  வேதாளம் அவனிடமிருந்து விடுபட்டு மீண்டு¢¢ம் புளிய மரத்திற்குச்  சென்று,   கிளையொன்றைப் பற்றிக்கொண்டு   தலைகீழாக தொங்க ஆரம்பித்தது.

மதிவாணன்